VIKEKE, 03 Marsu 2025 (TATOLI)—Konstrusaun Sítiu Jornada Rezisténsia Edimumu Antigu Kompañia FALINTIL ne’ebé lokaliza iha suku Makadiki Uaitame, postu administrativu Uatulari, munisípiu Vikeke, dadaun ne’e paradu kuaze tinan rua ona.
Xefe suku Makadiki Leten, Afonso dos Reis, relata konstrusaun sítiu referidu loloos finalizadu ona.
“Ha’u hanoin tuir loloos finalizadu ona tanba ne’e konstrusaun komunitária no ami líder komunitáriu sira mak kaer obra referida, maibé ita haree konstrusaun to’o agora seidauk ramata,” Afonso dos Reis hateten ba jornalista sira, iha aldeia Matadalan, Uatulari, segunda ne’e.
Notísia relevante: Progresu konstrusaun sítiu rezisténsia Edimumu Uatulari atinje 25%
Nia esplika katak obra ne’e antigu xefe suku Constantino Guterres mak kaer no tuir informasaun katak ex autoridade ne’e sei iha Dili, seidauk fila bá Uatulari.
Afonso haktuir katak konstrusaun foin atinje 50%, iha-ne’ebé konstrui ona monumentu no arku benvindu.
Respónsavel obra ne’e, atuál xefe aldeia Matadalan, suku Makadiki Uaitame, Luis de Menezes, haktuir, obra ne’e seidauk finaliza tanba tékniku no koordenadór sira mak laduun akompaña servisu hodi fó orientasaun ba badaen sira.
“Tan ne’e maka obra ida-ne’e sai paradu tanba ita-nia tékniku sira laduun akompaña servisu no koordenadór bá tiha Dili. Ha’u tenta kontatu ba koordenadór Constantino, maibé la simu. Ami hakarak kontinua serbisu hodi finaliza. Ho ida-ne’e ha’u hakarak husu ba ministériu relevante atu mai haree hodibele finaliza konstrusaun obra ne’e,” nia hato’o.
Konstrusaun Sítiu Jornada Rezisténsia Edimumu hahú nia konstrusaun iha tinan 2022. Orsamentu ba konstrususaun mai hosi VIII Governu Konstituisionál liuhusi Ministériu Komersiu, Indústria no Turizmu (MTKI) ne’ebé antes ne’e halo ona pagamentu pursentu 40% husi orsamentu $16.500 ba kompañia konstrutora.
Jornalista: Vitorino Lopes da Costa
Editór: Xisto Freitas da Piedade
