BOBONARU, 04 Marsu 2025 (TATOLI)—Eletrisidade Timor-Leste,Empreza Públika (EDTL,EP), foin lalais ne’e, implementa ona projetu instalsaun liña foun media no Baixa tensaun ba aldeia neen (6) iha postu administrativu Loloto’e, munisípiu Bobonaru hanesan aldeia Silagolo, Dilai, Anon, Guda-Taz, Tepa no Hol-lak ho totál uma-kain 1000-resin.
Notísia Relevante: Aldeia Olo-Olo no Galitas iha Bobonaro seidauk asesu liña eletrisidade
“Iha Loloto’e ne’e foin dadauk liña eletrifikasaun ba iha aldeia neen (6), ha’u bele dehan katak kobre uma-kain 1000 ba leten. Se ida-ne’e mak kuandu ita konklui hotu ona, postu administrativu Loloto’e liña eletrisidade kobre hotu ona, só iha aldeia ida mak labele kobre parte suku Deu-det, aldeia Oburo, tanba liña dook tebe-tebes husi Knua no mós Estrada. Ida-ne’e EDTL mós iha hanoin tíha ona para ita bele tau hela ba iha solar Panél,” nia informa ba jornalista sira, iha knar fatin, tersa ne’e.
Pakote ne’e inklui mós aldeia hirak ne’ebé iha suku Leber, postu administrativu Bobonaru mak hanesan aldeia Holbese, Mabelis no seluktan ne’ebé daudaun ne’e komesa la’o hela.
Daudaun ne’e, iha munisípiu Bobonaru ne’e, liña eletrisidade kobre ona suku 50 maibé sei falta aldeia balun iha Raifun, Ai-Asa no seluk tan maks eidauk asesu eletrisidade.
Iha tinan ne’e, EDTL, E.P sei esforsu implementa hodi kobre aldeia 193 iha munisípiu Bobonaru 100% asesu ona enerjía elétrika.
“Ha’u hakarak fó sai Raifun-foho sira husi EDTL Nasionál mai foti ona levantamentu dadus, agora sei prepara hela sira-nia dukumentu. Empreza sei loke konkursu ba kompañia sira, agora prosesu la’o hela. Depois aldeia Homesel ho Laho, ha’u simu despaixu husi Prezidente EDTL, E.P katak ida-ne’e tau ba iha liña Komunitária,” nia hateten.
Munisípiu Bobonaru iha aldeia 193, suku 50, postu administrativu neen (6) ho nia totál Populasaun hamutuk 106,543 ne’ebé kompostu husi feto 52,964 no mane 53,579 ho nia totál xefe família 20,802 ne’ebé haktuir iha dadus monografía Autoridade Munisípiu Bobonaru tinan 2022.
Notísia Relevante: EDTL fornese ona enerjia elétrika ba uma-kain 1,676 iha Bobonaro
Jornalista : Sérgio da Cruz
Editór : Cancio Ximenes
