iklan

BOBONARU, MUNISÍPIU

Aldeia Olo-Olo no Galitas iha Bobonaro seidauk asesu liña eletrisidade

Aldeia Olo-Olo no Galitas iha Bobonaro seidauk asesu liña eletrisidade

Tékniku EDTL.EP hahú halo instalasaun liña eletrisidade. Imajen Doc/Tatoli

BOBONARO, 17 janeiru 2025 (TATOLI)—Komunidade aldeia Olo-Olo no Galitas iha suku Lour, postu administrativu Bobonaro, munisípiu Bobonaro, dezde Timor-Leste ukun-aan to’o agora seidauk asesu liña eletrisidade.

Xefe suku Lour, Miguel Gomes Lopes, rekomenda ba Governu liuhusi EDTL, E.P atu tau-matan ba aldeia rua ne’e, tanba daudaun ne’e komunidade kuaze uma-kain 194 mak sunu de’it lampu tradisionál no instala Solár Painél hodi hetan netik naroman iha tempu kalan.

Notisía Relevante: Xefe suku Lour ezije EDTL instala elétrika ba aldeia rua

“Problema eletrisidade ne’e komunidade la’ós foin mak enfrenta. Dezde okupasaun Indonézia to’o agora ne’e komunidade helerik ba ahi. Kalan ne’e, komunidade kontinua toba iha nakukun laran de’it. Sira-ne’ebé mak iha kbiit ekonomía ne’e, sosa netik tenaga surya (solár painél), maibé sira-ne’ebé laiha ne’e halo lampu tradisionál, ahi-oan ne’e hodi fó naroman iha tempu kalan,” Autoridade Lokál ne’e informa ba Agência TATOLI iha Maliana,sesta ne’e

Aleinde ne’e, nia dehan, iha aldeia Helikei ne’e iha komunidade balun balun (50%) mak asesu ona liña eletrisidade maibé komunidade rasik mak halo kontribuisaun hodi sosa fiu no materiál eletrisidade seluk hodi tesi ai no au utiliza hanesan ai-riin eletrisidade atu fornese ahi ba sira-nia aan.

“Sira uza ai no au ne’e nakfilas sai ai-riin eletrisidade nian atu sira bele asesi eletrisidade, maibé ida-ne’e mós risku ba povu,” nia dehan.

Komunidade ne’ebé mak hela iha aldeia sira-ne’e sente laran triste tanba bainhira sira hateke ba suku viziñu sira-nia ahi-oan lakan kuaze tinan barak ona maibé sira nafatin moris iha nakukun laran iha tempu kalan.

Ho nune’e, nia dehan, afeta tebes ba komunidade nia moris liuliu menus asesu imformasaun kona-ba prosesu dezembolvimentu nasionál ne’ebé la’o iha territóriu liuliu implementasaun planu programa Governu iha munisípiu Bobonaro.

“Loos! Se ahí ka eletrisidade laiha ne’e, oinsá mak sira iha televizaun. Agora, meiu ida-ne’ebé komunidade halo mak sira atu asesu mídía ruma, sira tenke lori sira-nia telemovél ba karrega iha fatin ne’ebé mak distánsia do’ok husi fatin sira hela bá. Tanba ne’e, lori povu suku Lour nia naran, husu ba Governu liuliu EDTL, E.P, favór ida haree kestaun ne’e. Tanba, ida-neé, interrese povu nian. Ho razaun ida-ne’e, aleinde benifísíu ba povu, benifísíu mós Estádu tanba komunidade selu,” nia hateten.

Hatán ba kestaun ne’e, Jestór Eletrisidade Timor-Leste, Empreza Públika (EDTl, E.P) munisípiu Bobonaro, Mario de Jesús, hateten iha tinan ne’e sei esforsu atu rezolve tanba sira submete ona dadus sira-ne’e ba nasionál.

“Ami sempre hato’o informasaun ba ami-nia diresaun maibé buat hotu la’o ho orsamentu, ne’ebé ita hein. Ami-nia dadus kompletu hotu ona, dezeñu, dadus kliente no dezeñu Planta no Kadernu Enkargu (Bill off Quantity (BoQ) mós ami lavanta hotu ona. Ita hein, bainhira mak atu implementa, tama iha liña komunitária ka konkursu públiku maibé ezekutivu sira orienta ona. Ami empreza nia vizaun ba oin, esforsu makaas tebe-tebes atu nune’e ita-nia aldeia sira-ne’e bele asesu liña eletrisidade ka kobre hotu to’o 100%,” nia dehan.

Tuir dadus ne’ebé EDTL, E.P munisípiu Bobonaro rejista ne’e, iha suku 50 ne’ebé eziste iha Bobonaro ne’e kuaze asesu hotu ona enerjía elétrika no falta de’it aldeia 11 mak seidauk asesu liña eletrisidade.

Notísia Relevante: EDTL fornese ona enerjia elétrika ba uma-kain 1,676 iha Bobonaro

Jornalista : Sergio da Cruz

Editór        : Cancio Ximenes

iklan
iklan

Leave a Reply

iklan
error: Content is protected !!