DILI, 05 Marsu 2025 (TATOLI)-Ministériu Justisa (MJ) fó prioridade hamosu ka inísia lei liberdade relijioza durante mandatu governasaun.
“Ezbosu lei kona-ba liberdade relijiozu, ha’u lee tiha ona, buat balun iha ona ha’u nia meza, maibé labele halo buat hotu-hotu iha tinan ida nia laran, mandatu governasaun ne’e to’o 2028, entaun ita sei halo ida-idak, mais tui-tuir malu to’o hotu”, Ministru Justisa (MJ), Sergio Hornai, hateten hodi responde TATOLI iha prizasaun Bekora, kuarta ne’e.
Antes ne’e, Deputadu opozisaun husi Kmanek Haburas Unidade Nasionál Timoroan (KHUNTO), António Verdiál de Sousa, husu kria lei liberdade relijioza hodi bele regula grupu relijiaun sira ne’ebé tama mai hala’o atividade iha Timor-Leste ne’ebé dutrina la klaru.
Konstituisaun artigu 45 ne’ebé ko’alia konaba liberdade konxiénsia, relijaun no kultu ninian. Alínea 1) haktuir, ema hotu tenki iha liberdade ba konxiénsia, relijiaun no ba kultu, nune’e konfisaun relijiozu sira haketak ho Estadu, 2) labele halo ta’uk no labele diskrimina (hatún) ema ida tanba nia konviksaun relijioza, 3) Iha garantia ba objesaun tuir konxiénsia, tuir lei haruka, 4) Iha garantia ba liberdade atu hanorin relijiaun ne’ebé de’it, maibé iha relijiaun ida-idak nia laran.
Notísia relevante: KHUNTO husu kria lei liberdade relijioza regula grupu relijiaun tama TL
Jornalista : Nelson de Sousa
Editora : Rita Almeida
