BOBONARU, 06 Marsu 2025 (TATOLI)—Prezidente Komferénsia Episkopál Timorense (CET, sigla Portugés), Dom Norberto do Amarál, husu ba sarani sira iha Timor laran tomak atu reza ka hasa’e orasaun ba Maromak hodi haraik forsa no isin-di’ak ba Papa Francisco atu rekupera lalais.
Atuál Bispu Dioseze Maliana ne’e hato’o agradesimentu ba Maromak tanba ho idade 88 no sofre moras komplikadu mós, Papa Francisco sei bele auguenta morís to’o ohin loron.
Notísia Relevante: Kondisaun saúde Papa hatudu progresu di’ak uitoan maski sei iha estadu krítiku
“Santu Padre nia Pulmaun ida de’it maibé agradese ba Maromak tanba nia bele bertahan to’o agora ne’e. Mai, ita hotu-hotu reza, halo ita-nia orasaun ba nia, atu nia saúde bele rekupera lalais hodi fali ninia kna’ar hanesan baibain,”Bispu Dioseze Maliana, Dom Norberto do Amarál, apela ba jornalista sira iha Igreja Parokia Santa Cruz Maliana, kuarta (05 Fevereiru 2025) ne’e.
Papa Francisco rekupera husi krítiku
Antes ne’e, Núnsiu Apostóliku Vatikanu iha Timor-Leste, Monsénor Marco Sprizzi, informa Papa Francisco rekupera ona husi krítiku.
“Santu Padre Papa Francisco nia kondisaun rekopera ona, ohin buletin ikus ne’ebé fó sai husi dotór iha kalan ida-ne’e katak kondisaun Santu Padre Papa Francisco dehan di’ak ona, la kritiku,” dehan Monsénor hafoin hasoru Prezidente Repúblika, José Ramos Horta, iha Palásiu Prezidensiál, sesta (28 Fevereiru 2025) ne’e.
Núnsiu Apostóliku Vatikanu hatutan, Santu Padre Papa Francisco tratamentu hela iha ospitál, ne’ebé hetan kuidadu ba tratamentu ne’ebé simples maibé ho kualifikadu.
“Ami fiar katak Santu Padre Papa sei fila fali ba Vatikanu no ha’u sei hasoru fali nia hodi hato’o kariñu Timorense nian ba Papa”, nia dehan.
Nia hatutan, Prezidente Republika sempre kontaktu loron-loron hodi husu atualizasaun Papa nia kondisaun, klaru katak nia sei foti ida-ne’e ba Santu Padre, Timorense nia apresia, husi Prezidente Repúblika, Bispu, Primeiru Ministru, no imi hotu, tanba Papa sempre dehan Timor nia rikeza ne’ebé boot liu mak ninia povu.
“Ha’u hakarak hatutan tan buat ruma ne’ebé ha’u sei lori mós ho ha’u iha ha’u-nia fuan, Timor-Leste, karik imi hakarak, kariñu, domin, hamnasa husi timoroan ida-idak ne’ebé hasoru malu la’ós de’it iha Dili maibé mós iha área remota sira, kapela, aldeia no ema hotu sei lori ho fuan ba Vatikanu,” nia dehan.
Jornalista : Sergio da Cruz
Editór : Cancio Ximenes
