DILI, 06 Marsu 2025 (TATOLI)-Koordenadór Gabinete Unidade Kurríkulu Nasionál, João Maupelu, hatete ME sei implementa gradualmente kurríkulu foun ba Ensinu Báziku terseiru siklu inklui manuál iha tinan-oin.
“Ita hein katak 2026 ita implementa kurríkulu foun ba terseiru siklu, ita implementa gradualmente”, katak nia iha salaun City8 Manleuana, ohin.
Nia dehan ministériu kontinua hakerek manuál ba sétimu anu, ne’e sei hahú iha Outubru no konklui iha Marsu tinan-ne’e. Manuál ba disiplina 11 inklui ho disiplina relijiaun nian, Igreja mak elabora.
Nia dehan dirasaun kurríkulu kontinua hakerek manuál alunu ba sétimu anu, ne’ebé envolve mós giaun ba profesór kada disiplina no Marsu ne’e finaliza ona. Nune’e kontinua kedas ho manuál alunu ba giaun profesór ba oitavu anu.
Notísia relevante: ME halo konsulta esbosu kurríkulu ensinu báziku terseiru siklu
Antes ne’e ekipa husi Gabinete Unidade Kurríkulu Nasionál iha Ministériu Edukasau halo ona konsulta ba esbosu kurríkulu ensinu báziku terseiru siklu (7°, 8° no 9° ano) ho eskola inklui entidade relevante sira.
Matéria sira-neʼebé mak iha ensinu báziku terseiru siklu, hanesan iha área dezenvolvimentu linguístika mak lian-tétun, portugés, no inglés iha área dezenvolvimentu sientífiku mak matemátika, siénsia fízika no naturál istória no jeografia, iha área dezenvolvimentu sosiál ka pesoál mak edukasaun fízika, edukasaun artístika, edukasaun sívika, sidadania no direitu umanu, edukasaun rejiaun no morál, inklui kompeténsia ba moris no traballu.
Notísia relevante: KM aprova dekretu-lei kurríkulu ensinu báziku nasionál
Jornalista : Osória Marques
Editora : Rita Almeida
