KOVALIMA, 06 Marsu 2025 (TATOLI) – Rezultadu investigasaun ba asidente karreta ambulánsia multi-funsaun ne’ebé baku fila iha Kovalima hatudu katak motorista la ho kondisaun konsumu álkool ka hemu tua mak transporta pasiente ho emerjénsia, husi Zumalai mai iha kapitál munisípiu.
“Ami forma ekipa ki’ik ida atu halo investigasaun tuun direta ba fatin akontesimentu asidente hodi rekolla dadus no mai iha administrasaun ho pasiente deklara motorista kondús karreta ambulánsia la’ós ho kondisaun hemu álkool maibé karreta baku fila tanba asidente”, Diretór servisu saúde Munisípiu Kovalima, Domingos Sequeira relata rezultadu ne’e ba TATOLI, iha nia servisu fatin Kamenasa, ohin.
Notísia relevante:Ambulánsia baku fila, Saúde Kovalima forma ona ekipa halo investigasaun
Ezekutivu ne’e relata katak, ekipa investigasaun la identifika tanba ekipa rekolla informasaun iha fatin sira hanesan Sentru saúde, Administrasaun postu Zumalai, tuun ba iha fatin akontesimentu no husi pasiente rasik.
Ho nune’e pasiente ne’ebé mak motorista transporte husi Zumalai mai iha munisípiu daudaun ne’e nia kondisaun di’ak ona no fila ona ba nia uma.
Dirijente ne’e mós klarifika kata hafoin karreta ambulánsia baku fila ema balun espalla informasaun iha mídia sosiál Facebook katak ambulánsia baku fila tanba motorista kondús ambulánsia ho kondisaun lanu maibé rezultadu investigasaun la deteta ida-ne’e.
Presiza haree uluk kondisaun karreta
Ho nune’e nia fó hanoin ba motorista sira ne’ebé lori karreta ambulánsia molok atu viajen tula pasiente sira presiza haree uluk kondisaun karreta ambulánsia ne’ebé sei utiliza.
“Ami kada fulan halo avaliasaun servisu nune’e fó hanoin malu, atu lori karreta ho kuidadu molok atu hakarak sai haree uluk kondisaun karreta”, nia dehan.
Fó hanoin fali katak, ambulánsia multi-funsaun ho xapa mátrikula G 07088 baku fila maizumenus iha tuku 11:00 kalan baihira transporta pasiente husi postu Zumalai mai iha ospitál referál Suai no to’o iha dalan klaran hetan asidente.
Asidente ne’e akontese iha 16 Fevereiru no Servisu saúde Kovalima foti karreta ambulánsia multi-funsaun iha loron 17 Fevereiru ne’e no daudaun karreta ambulánsia multi-funsaun rai hela iha Servisu Saúde Kovalima.
Jornalista: Celestina Teles
Editór: Rafael Ximenes de A. Belo
