OEKUSI, 07 Marsu 2025 (TATOLI)– Autoridade Rejiaun Administrativa Espesiál Oekusi Ambeno (RAEOA) liuhusi Servisu Agrikultura, fasilita tratór unidade haat atu fila-rai iha komunidade nia natar ektare 15 ne’ebé abondona iha Nunuheno, aldeia Noeninen, suku Cunha, sub-rejiaun Pante Makasar.
Tanba ne’e, Sekretária Rejionál ba Asuntu Agrikultura, Filomena Sila, kinta ne’e, ofisialmente halo lansamentu hodi apoia tratór unidade haat, nune’e bele fila natar sira atu kuda iha tempu badak.
Notísia relevante:Tratór 14 hosi Oe-Cusse hahú fila-rai iha suku neen ba époka 2023
“Ami apoia bazea pedidu ne’ebé agrikultór sira hato’o ba diresaun tanba natar sira-ne’e abandona tinan haat ona dezde 04 Abríl 2021, agora mak foin halai fali tan ne’e ohin ita mai lansa ba ektare 15 ho uma-kain 63,” dehan Sekretária Rejionál ba Asuntu Agrikultura.
Hafoin simu mandatu nu’udar Sekretária Rejionál Agrikultura konsege rezolve ona natar balun mak abandona tinan barak ona, hanesan ektare 52 iha Holokhau suku Lifau, balun iha suku Lalisuk no suku Cunha.
“Ohin ha’u mós ko’alia ho natar na’in-63 katak tenke unidade nafatin ho komitmentu, nune’e programa fila-rai iha natar sira bele la’o susesu, ohin ita fó ona tarjetu iha semana bele finaliza atubele komesa kuda ona tanba agrikultura sei apoia adubu orgániku AMO,” nia informa.
Iha fatin hanesan, Xefe Aldeia Noeninen, António Váz, agradese ba Autoridade RAEOA tanba tinan ne’e bele hahú fali natar sira hafoin hetan estragu iha tinan haat liuba.
“Ha’u lori komunidade sira agradese ba bo’ot sira, tanba durante tinan haat natar sira-ne’e abandona dezde 2021 tan ne’e mak foin daudaun, ami ba husu apoia no ohin ita halo lansamentu, maibé mós rekomenda nafatin atu apoia ami, hadi’a ami-nia irigasaun no apoia mós fini, tanba tinan haat ne’e balun fini laiha,” nia rekomenda.
Entretantu, tuir polítika Autoridade liuhusi Sekretária Rejionál Agrikultura katak programa fila ne’e komunidade mak reponsabiliza kona-ba kombustivél no Autoridade prepara tratór no tratorista.
Notísia relevante:Agrikultura Oekusi rega adubu orgániku AMO ba natar ektare 52
Jornalista: Abílio Elo Nini
Editór: Florencio Miranda Ximenes
