OEKUSI, 27 Fevereiru 2025 (TATOLI) –Sekretária Rejionál ba Asuntu Agrikultura, liuhusi Diresaun Rejionál Agrikultura, kinta ne’e, hahú aplika adubu orgániku Ako’y Magsasakang Orgániku (AMO) hodi rega ba natar ektare 52 ba natar iha Holokahau, suku Lifau, sub-rejiaun Pante Makasar, Rejiaun Administrativa Espesiál Oekusi Ambeno (RAEOA).
Objetivu husi rega adubu orgániku AMO ne’e hare sira bele sai matak no hasa’e produsaun agrikola no bele mós hamate peste lakataru.
Notísia relevante:Autoridade RAEOA sosa adubu orgániku AMO hodi hasa’e produsaun agríkola
“Ita bazea ba pedidu mai husi agrikultór sira iha natar Holokahau hamutuk uma-kain 86, mak ita fornese hela ai-moruk hanesan faze primeiru ita gasta AMO falun 350, tanba kada ektare ne’e tenke uza falun 7, agora iha rega ne’e ektare 52,” Amaro Efi, informa iha ámbitu ne’e.
Nia informa, aplikasaun adubu AMO ne’e, la’os direita ba agrikultór sira maibé fasilita husi tékniku estensionista suku nian, katak área natar Holokhau, ne’ebé abandonadu kuaze tinan barak ona, tan ne’e tinan ne’e servisu agrikultura Oekusi hakarak halo demplotu ida iha ne’e ho área kultiva ektare 52.
“Ita aplika ne’e hahú husi inisíu kuda to’o faze kolleta tanba ne’e tama ba kategória demplotu, entaun agrikultór sira-ne’ebé hakarak aplika sistema ne’e, entaun ita apoia maibé la’ós ai-moruk ne’e fó direita ba natar na’in-sira maibé apoia koloka kedas ho tékniku sira, mak rega hahú inisiíu to’o kolleta nune’e ita bele haree nia progresu liuhusi amostra (crop-cuting) nian,” nia hateten.
Daniel Colo nu’udar natar na’in iha suku Lifau, sente orgullu tanba natar sira iha área Holokahau abandonadu tinan barak ona, maibé tinan ne’e hetan apoia téknika husi Diresaun Rejionál Agrikultura Oekusi, nune’e bele halai natar sira ne’e.
“Ami-nia esperansa mak ne’e akompaña nafatin ami tanba agora regu ho abudu foun, ita kompara uluk ami rega uza ai-moruk baibain ami hola iha loja sira-ne’e, maibé hare nia tahan sai mean no hetan atakasaun husi ular-oan, tan ne’e ami agradese maske seidauk hatudu rezultadu maibé ami espera tau matan nafatin to’o ami kolleta,” nia orgullu.
Lembra fali katak, iha tinan 2025 ne’e Sekretária Rejionál Agrikultura RAEOA, konsege sosa ona adubu AMO hamutuk pakote rihun 27 ho kustu rihun $600, husi empreza JJEA Agriventures CO husi nasaun Filipina atu utiliza ba natar no to’os rai maran iha Oekusi.
Notísia relevante:PA RAEOA lansa adubu orgánika hasa’e produsaun no hamate Lakataru
Jornalista: Abílio Elo Nini
Editór: Florencio Miranda Ximenes
