OEKUSI, 04 Maiu 2026 (TATOLI) –Autoridade Rejiaun Administrativa Espesiál Oekusi Ambeno (RAEOA), liderada Régio da Cruz Salu, fó-sai katak, iha tempu-badak Autoridade sei halo ezersisíu ba Orsamentu Jerál Estadu (OJE) 2026 nian, hodi deside antes halo rekrutamentu ba funsionáriu kazuál ne’ebé antes ne’e hetan ona notifiksaun atu termina kontratu iha fulan-Marsu 2026 ne’e.
Notísia relevante:Posibilidade, Kontratu Funsionáriu 1.500-resin iha RAEOA sei “hapara”
Tuir Régio Salu, tanba daudaun ne’e institutuisaun serbisu rejionál monta ona estrutura, nune’e serbisu sira presiza atu aselera dezenvolvimentu iha setór área idak-idak sei define. Entaun estruturál atu priénxe kargu ba Xefe Departementu no Xefe Seksaun tenki liuhusi prosesu funsaun públika.
Nia hateten, se nesesidade ruma atu presiza sira serbisu atu hetan apoia, tempu-badak hanesan funsionáriu kazuál sira ne’e tama iha programa prioridade planeiamentu tenke iha kabimentasaun bele la’o tuir, “ne’e signifika presiza orsamentasaun”.
“Ami sei halo ezersisíu, nune’e haree fila-fali OJE 2026 ba RAEOA, ne’ebé dezde loron 01 Janeiru to’o ohin koloka ona, agora ho estrutura foun, ita sei halo ezersisíu atu halo revizaun atu koloka tuir kargu xefia foun no diresaun foun, ne’ebé estabelesida no hetan ona pose husi Governu,” nia informa ba jornalista iha Oekusi.
Notísia relevante:Atividade tolu iha administrasaun Oekusi paradu, hafoin funsionáriu 60 notifikadu
Eis-Sekretáriu Rejionál Agrikultura ne’e rekoñese katak, antes ne’e Autoridade RAEOA notifika funsionáriu kazuál 1.500-resin hodi hapara kontratu iha fulan-Marsu 2026 ne’e tanba kumpre orientasaun husi Governu Sentrál.
Maibé hafoin Governu nomeia estrutura definitiva, Autoridade RAEOA sei hamosu mekanizmu rua ba estututu funsionáriu kazuál hirak-ne’e, nune’e bele redús dezempregu iha Oekusi.
“Serteza, diresaun balu iha staff ema na’in-rua de’it, institusaun Estadu nian labele serbisu ho ema rua de’it, ne’e signifika, Diretór ida dupla funsaun, nia rasik lori karreta no nia rasik tuun ba povu iha baze, entaun mekanizmu iha oin rua, ita sei kontinua halo rekrutamentu tuir prosesu Komisaun Funsaun Públika diresaun sira, segundu sira-ne’ebé presiza atu ajuda lalaís ne’e presiza Funsaun Públika atu bolu fali sira, maibé ita presiza funsionáriu kazuál ne’ebé méritu iha liur maske la’ós funsionáriu públiku, tenki mai ho rasionalidade por prioridade atu kontinua,” nia afirma.
Notísia relevante:PDHJ deteta funsionáriu barak iha Oekusi dezobidiente ba enkuadramentu legál
Antes ne’e, Prezidente Autoridade RAEOA, Régio da Cruz Salu, informa, katak autoridade entrega ona karta informativa ba funsionáriu kontratadu no termu-sertu sira hamutuk na’in-1.597 atu ‘hapara kontratu’ iha loron 31 Marsu 2026 ne’e, bazeia orientasaun husi Komisaun Funsaun Públika (KFP).
Régio Salu esplika, husi funsionáriu 1.597 ne’e, kobre diresaun hothotu, só diresaun tolu mak nesesáriu atu kontinua mantein hanesan Diresaun Rejionál Saúde, Diresaun Rejionál Edukasaun no Departamentu EDTL.
Notísia relevante: Orsamentu millaun $60 ba RAEOA aprovadu iha espesialidade
Entretantu, tuir dadus ne’ebé Ajénsia Tatoli, I.P asesu katak totál funsionáriu iha Oekusi hamutuk 2842, komposta husi nomeasaun polítika naʼin-rua (2), funsionáriu permanente na’in-1.245.
Nune’e mós funsionáriu ajénte administrasaun na’in-1.284, funsionáriu kontratadu na’in-250, asisténsia téknika nasionál naʼin-44, asesór nasionál naʼin-ualu (8) no asesór internasionál na’in-sia (9).
Jornalista: Abílio Elo Nini
Editór: Rafael Ximenes de A. Belo
