OEKUSI, 25 Marsu 2026 (TATOLI) – Diretór Diresaun Rejionál Administrasaun Rejiaun Administrativa Espesiál Oekusi Ambeno (RAEOA), José Tanesib Anunu, kuarta ne’e fó-sai katak, atividade tolu iha Diresaun Rejionál Administrasaun tenke paradu tanba menus rekursu umanu, hafoin funsionáriu na’in-60 simu notifikasaun husi Prezidente Autoridade, atu termina kontratu iha loron 31 Marsu 2026 ne’e.
“Notifikasaun ne’e afeta ba serbisu barak, liliu afeta iha parte tolu: primeiru, agora atu lori apoia ba vítima dezastre naturál, semak lori sasán sira hanesan karon no sasán seluktan, operasaun animál tenke paradu, terseiru mak kuandu iha seremónia ruma semak lalin meza no kadeira, la’ós ha’u diretór mak serbisu buat sira-ne’e, agora sira na’in-60 mós la tama ona serbisu, tanba notifikasaun simu ona, atu termina kontratu iha 31 Marsu ne’e,” José Anunu ba jornalista sira iha salaun administrasaun Numbei, ohin.
Notísia relevante:Posibilidade, Kontratu Funsionáriu 1.500-resin iha RAEOA sei “hapara”
Tuir nia, notifikasaun ne’e baze iha tanba ho razaun orsamentu la sufisiente atu selu funsionáriu sira-ne’e, maibé ne’e desizaun husi Prezidente Autoridade RAEOA tanba Orsamentu Jerál Estadu (OJE) 2026 ba saláriu funsionáriu la sufisiente.
“Agora hela permanente na’in- 30 resin, maibé inklui kondutór, balun jestór postu administrativu, balun apoia iha postu sira, semak foti kadeira, operasaun animál no atividade suku nian ba preparasaun Governu Lokál ne’e,” nia hateten.
Tanba ne’e, Diretór ne’e dehan, prosesu atu kontinua ka la’e, depende desizaun Governu atu ativa fali sira ou rekrutamentu foun fali, tanba mudansa ne’e la’ós akontese de’it iha RAEOA maibé munisípiu hotu.
“Hanesan ha’u-nian, sira na’in-60 simu ona notifikasaun, tanba kontratu termu-sertu, balun kontrata dezde autoridade anteriór husi 2014 to’o ohin loron,” nia hateten.
Notísia relevante:Reajusta tabela salariál, funsionáriu kontratadu RAEOA seidauk simu vensimentu
Eis-Vise Ministru Adminitrasaun Estatál ne’e, esplika, bazeia lei númeru 3/2014 ba estatutu RAEOA, prevista iha artigu ida, informa katak, funsionáriu sira iha RAEOA ne’e, lahanesan ho munisípiu seluk, tanba funsionáriu iha RAEOA tutela direita ba iha Prezidente Autoridade.
Entaun bainhira Prezidente Autoridade presiza, nia iha kompeténsia atu hatama ema, tanba lei fó dalan, ezemplu hanesan diresaun sira hotu, kuandu presiza rekursu ruma, sira halo pedidu ba Prezidente Autoridade hetan aprovasaun, bele halo ona kontratu nein intervensaun husi Komisaun Funsaun Públika (KFP) lei ida-ne’ebé vigór hela iha lei númeru 3/2024 ne’e.
“Ha’u ladún rekor lei ne’e, maibé lei ne’e agora sei vigór hela. Kompeténsia sei iha Prezidente Autoridade. Ita iha pergunta, tanba saida mak husi 2014 to’o 2025, Komisaun Funsaun Públika labele interven ba RAEOA, tanba lei ida-ne’e, tanba hothotu funsionáriu RAEOA ho nia kompeténsia iha Prezidente Autoridade, nia mak bele hasai no bele hatama,” nia hateten.
Notísia relevante:PA RAEOA simu ona karta husi Governu, mandatu sei termina iha 31 Marsu 2026
Antes ne’e, Prezidente Autoridade RAEOA, Régio da Cruz Salu, informa, katak autoridade entrega ona karta informativa ba funsionáriu kontratadu no termu-sertu sira hamutuk na’in-1.597 atu ‘hapara kontratu’ iha loron 31 Marsu 2026 ne’e, bazeia orientasaun husi Komisaun Funsaun Públika (KFP).
Régio Salu esplika, husi funsionáriu 1.597 ne’e, kobre diresaun hothotu, só diresaun tolu mak nesesáriu atu kontinua mantein hanesan Diresaun Rejionál Saúde, Diresaun Rejionál Edukasaun no Departamentu EDTL.
Jornalista: Abílio Elo Nini
Editór: Rafael Ximenes de A. Belo
