OEKUSI, 27 Fevereiru 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Crus Salu, fó-sai katak, daudaun ne’e estrutura tranzitóriu RAEOA simu ona karta husi Governu Sentrál, kona-ba mandatu tranzitóriu Autoridade atuál sei termina iha loron 31 Marsu 2026.
Tanba ne’e, Autoridade Oekusi-oan ne’e afirma, prontu simu dezafíu no promete sei apoia estrutura foun, atu kontinua dezenvolve rai-ketan Oekusi Ambeno.
“Ita lalika preokupa ho mudansa ruma, tanba estrutura atuál ne’e tranzitóriu. Ne’e tenkiser, tranzitóriu remata, entaun definitivu, saida mak akontese, karta husi Governu Sentrál ha’u simu ona, katak 31 Marsu 2026, mandatu tranzitóriu atuál ne’e remata, termu sertu sira hotu mós sesa (hakotu), no kontinua ho estrutura foun definitivu, mak haree prioridade sira inklui rekursu umanu,” Régio Salu iha Oekusi dehan, ohin
Notísia relevante:PM Xanana atribui prioridade neen ba PA RAEOA ezekuta durante fulan tolu
Ezekutivu ne’e konfirma, Oekusi iha oportunidade barak loos, dala barak ita haree de’it buat ida, hanesan ita dehan katak, haree de’it buat ida, maibé buat hothotu ne’e poténsia boot iha Oekusi, satan agora iha Fundu Espesiál Dezenvolvimentu (FED) ita la mesak deside iha Oekusi ita hamutuk ho Governu Sentrál, sira mai akompaña no dudu lalais.
“Ne’e la’ós buat foun, tanba estrutura atuál ne’e tranzitóriu, iha tranzitóriu ne’e ami iha mandatu no ami iha obrigasasaun, se signifika ami barak maioria la kumpre ami-nia obrigasaun prinsipál, Governu atu lori fali ekipa foun, ami prontu no ami apoia nafatin,” nia hateten.
Maibé serteza planu estratéjiku foun estrutura atuál sei kontinua elabora hela, tanba nia durasaun ei to’o fulan Jullu 2026 tenki aprova, nune’e orsamentu foun ba 2027 bele sira (estrutura foun) la’o tuir planu foun.
“Ne’ebé, lalika preokupa tanba ne’e normál, tanba ita tranzitóriu, uluk mós ita dala barak iha Governu tranzitóriu, nusa mak Oekusi-oan hakfodak fali, ne’e laiha problema, hamriik nafatin metin iha ita-nia rai, povu nia didnidade. Ha’u apela ba matenek Oekusi-oan sira, ha’u nia membru autoridade sira mós ha’u informa ona ba sira, prontu atu simu dezafíu prontu mós atu bele troka, lori fali ekipa foun,” nia afirma.
Notísia relevante:PM Xanana nomea Régio da Cruz sai Prezidente Autoridade RAEOA
Nia hateten, iha reuniaun enkontru membru autoridade, balu iha polítika atu implementa programa ho dezafia, maibé ikus kuandu la simu, tenke ema seluk mak kontinua, ne’e laiha problema, no lalika tauk ba mudansa, mudansa tenke akontese tanba dinamika reajustamentu tenki akontese.
“Tanba ita la mai iha ne’e atu estagnadu, ita uluk, ha’u rasik kuandu seidauk tama ne’e, ha’u sempre hateten, estagnasaun estruturál, ita agora iha ne’e, ita labele hakfodak kuandu Governu haree estagnasaun akontese, ita lakoi fali atu bele mudansa, tenkiser halo mudansa reajustamentu tenki akontese,” nia hateten.
Notísia relevante:Governu estende mandatu Prezidente RAEOA
Antes ne’e, iha reuniaun Konsellu Ministru, kuarta (27 Agostu 2025) ne’e, Governu liuhusi reuniaun Konsellu-Ministru aprova projetu rezolusaun ba ezonera estrutura hahú husi Prezidente no membru autoridade Rejiaun Administrativa Espesiál Oekusi Ambenu (RAEOA) iha 31 Agostu 2025.
Durante reuniaun ne’e, Primeiru Ministru Kay Rala Xanana Gusmão aprezenta rezolusaun kona-ba Rejiaun Administrativa Espesiál Oekusi Ambenu (RAEOA) atu disolve komisaun ezekutiva ho hanoin atu estabelese Zona Ekonómika Espesiál Dezenvolvimentu Oekusi Ambenu (ZEEDOA).
Iha dokumentu ofisiál portál Governu deklara katak, Governu sei ezonera Prezidente no membru autoridade RAEOA nian hahu iha 31 Agostu 2025 no nomea estrutura foun ida hodi garante kontinuidade administrasaun nian hahú iha 01 Setembru 2025.
Aleinde ne’e, Governu mos nomea hotu estrutura husi kargu diresaun no xefia sira iha Rejiaun Administrativa Espesiál Oekusi Ambenu (RAEOA) mak hanesan;
Domingos Punef assume knaar nu’udar Diretár-Jerál Rejionál; José Tanessib Anuno nu’udar Diretór Rejionál Administrasaun; Augusto de Fátima Efi nu’udar Diretór Rejionál Planeamentu no Aprovisionamentu; Amâncio Aguido Punef nu’udar Diretór Rejionál Finansas.
Merita Marques Caunan Lafo nu’udar Diretora Rejionál Saúde; Vicêncio Cono nu’udar Diretór Rejionál da Edukasaun no Solidariedade Sosiál, José Oki nu’udar Diretór Rejionál Agrikultura; Orlando Quelo nu’udar Diretór Rejionál Komérsiu no Indústria.
Nune’e mós Governu nomea Remígio Nuno Sila nu’udar Diretór Rejionál Infraestruturas; Domingos de Almeida nu’udar Diretór Rejionál Transporte no Komunikasaun; Carlos de Fátima de Almeida nu’udar Diretór Rejionál Juventude no Desportu; Anastásia Eni nu’udar Diretora Rejionál Turizmu, Arte no Kultura; José Ase Neno Colo, nu’udar Diretór Rejionál Terras no Propriedade no Herculano de Sousa mak asume kargu hanesan Koordenadór ba Implementasaun Zona Ekonómika Espesiál Dezenvolvimentu Oekusi Ambenu (ZEEDOA).
Notísia relevante:Herculano Sousa prioriza asuntu tolu durante mandatu lidera ZEEDOA iha Oekusi
Jornalista: Abílio Elo Nini
Editór: Rafael Ximenes de A. Belo
