OEKUSI, 15 Maiu 2026 (TATOLI) – Ministériu Koordenadór Asuntu Ekonomia (MKAE), iha prontidaun atu apoia Autoridade Rejiaun Administrativa Espesiál Oekusi Ambenu(RAEOA), atu estabelese roteiru (roadmap) nu’udar preparasaun ba atividade merkadu livre (free trade zone) fronteira hodi kontribui ba prosesu dezenvolvimentu ekonómia Timor-Leste nia adezaun ba Organizasaun Mundiál Komérsiu (OMK).
Notísia relevante:MKAE divulga importánsia adezaun Timor-Leste ba OMK iha Oekusi
Koordenadór Jerál ba Gabinete Vise Primeiru-Ministru I, Ministériu Koordenadór Asuntu Ekonomia, Jorge Rui de Carvalho Martins, hato’o nia apresiasaun ne’e, hafoin koordena Prezidente Autoridade RAEOA atu estabelese roteiru iha Oekusi.
“Ida-ne’e planu di’ak teb-tebes, foin iha Oekusi mak ami rona planu furak husi Prezidente Autoridade atu estabelese roadmap ba dezenvolvimentu ekonomia RAEOA nian, ne’e kapa’as, MKAE nafatin prevee nia prontidaun, nune’e setór hothotu ko’alia hamutuk hanesan ohin iha Oekusi,” nia hateten iha salaun Alfándega Oekusi, sesta ohin.
Tuir nia, abitu ida hanesan ne’e, presiza tuur hamutuk atu diskute hodi deside hamutuk hanesan ne’e, sai hela obstáklu institusionál iha Timor-Leste, maibé Governu liuhusi MKAE tenta fasilita atu hothotu diskute duni diferénsia husi milaridade, nune’e iha solusaun integrada ida ba ajenda dezenvolvimentu ekonomia.
“Ne’ebé, inisiativa RAEOA atu harii roadmap ne’e kapa’as tebes, tanba tuir elaborasaun Autoridade RAEOA nian, sei envolve setór hotu, ida-ne’e di’ak, MKAE haree duni oinsá atu bele integra setór hotu atu diskute estratéjia dezenvolvimentu ida ho integradu, kapa’as no furak ba povu, sei ita la halo hanesan ne’e, susar ba ita-nia rain atu ba oin,” nia hateten.
Notísia relevante:Timor–Leste no Indonézia hakbesik-aan ba zona free trade iha fronteira
Iha fatin hanesan, Prezidente Autoridade RAEOA, Régio da Cruz Salu, informa atu aproveita oportunidade nakloke hanesan OMK no ASEAN, RAEOA tenke hadi’a kapasidade rekursu umanu no sistema finanseiru, liga objetivu atu Oekusi nu’udar zona komérsiu livre ho zona ekonomia espesiál ida iha Timor-Leste ba dezenvolvimentu ekonomia.
“Saida mak autoridade atuál ne’e halo, aleinde haree haree kapasidade no funsionamentu institusionál governasauna administrativa, maibé ita tenke prepara roadmap ida no tenke estabelese, nune’e ita-nia setór privadu ho komunidade sira iha rejiaun ne’e, ita faz parte ona kontribuisaun importante ba oportunidade ba merkadu no komérsiu ne’e,” nia hateten.
Tanba ne’e, nia dehan, roadmap ne’e, saida mak sei akontese, ita hahú husi nível komunidade, família, empreendedorizmu tenke moris, pequeno médiu indústria tenke moris, semak akompaña no reforsa, maka Kamara Komérsiu Indústria Timor-Leste (CCI-TL), organizasaun baze komunitária ekonómiku grupu kapitál sosiál ekonómiku sira.
“Ita tenke enkuadra mobiliza fasilita sira iha asaun movimentu empreendedorizmu, hanesan antes ne’e ita lansa ona ba públiku,” nia hateten.
Notísia relevante:Governu sei dezenvolve zona komersiu livre iha fronteira
Jornalista: Abílio Elo Nini
Editór: Rafael Ximenes de A. Belo
