DILI, 07 Marsu 2025 (TATOLI)—Grupu Feto Parlamentár Timor-Leste (GMPTL), sesta ne’e, selebra loron internasionál feto ho tema ‘feto no labarik feto iha ninia direitu, igualdade no empoderamentu.’
“Iha biban ida-ne’e, Parlamentu Nasionál liuhusi GMPTL hakarak reafirma kompromisu halo advokasia hodi promove feto no labarik feto sira-nia direitu liuhusi lejizlasaun ne’ebé vigora iha Timor-Leste,” Prezidente GMPTL, Aliança da Conceição Araújo, hato’o iha diskursu iha ámbitu selebrasaun loron internasionál feto.
Notísia relevante : Loron mundiál feto, PM Xanana subliña proporsiona igualdade no empoderamentu
GMPTL mós sei kontinua akompaña no halo fiskalizasaun ba implementasaun polítika implementasaun programa husi IX Governu Konstituisionál nian, liuliu iha ámbitu protesaun sosiál no feto, labarik feto, ema ho defisiénsia no grupu vulnerável sira, ba Timor-Leste ida iguál, justu no seguru.
“Ita hotu hatene no akompaña realidade moris ne’ebé Timor-Leste hasoru prevalese diskriminasaun no violénsia hasoru feto, labarik feto, ema ho defisiénsia no grupu vulnerável sei kontinua akontese. Maski Timor-Leste aprova ona lejizlasaun relevante no ratifika ona instrumentu legál internasionál sira,” nia akresenta.
Promove partisipasaun feto
Biban ne’e, Deputada Bankada Governu husi Kongresu Nasionál Rekonstrusaun Timorense (CNRT) ne’e konvida parte hotu atu iha hanoin no asaun ida hodi promove no proteje feto nia partisipasaun no iha korrajen atu fó responsabilidade iha setór hotu.
Reprezentante povu ne’e konvida mós parte hotu atu refleta fali konkista ne’ebé feto sira alkansa ona no dezafiu sira.
Grupu ne’e hakarak fó omenajen ba feto timoroan sira ne’ebé sakrifika sira-nia an iha luta ba independénsia hasoru inimigu, torturasaun, bonbardiamentu no hamlaha.
Fó mós omenajen ba feto maluk internasionál ne’ebé mate iha país sira ne’ebé iha konflitu hanesan Ukránia, Myanmar, no Palestina.
Iha sorin seluk, Reprezentante UN Women iha Timor-Leste, Nishtha Satyam, hateten, selebrasaun ne’e hodi fó onra ba feto no labarik feto sira ne’ebé mak hola pozisaun iha liña frente.
Nia mós defende kona-ba papél importante husi sosiedade ida inkluzivu no justu liuhusi promosaun feto sira iha lideransa hodi ko’alia kona-ba lia loos.
“Bainhira demokrasia falla, feto hanesan ema ne’ebé dahuluk atu sente falla ida-ne’e,” nia tenik.
Tanba ne’e, Nishtha Satyam konsidera iha razaun forte hodi selebra loron ba feto sira.
“Obrigadu barak tanba imi hili ona feto ida nu’udar Prezidente Parlamentu Nasionál. Parabéns no ita fiar katak feto sei muda mundu no feto sei muda futuru bainhira sira-nia moris iha mudansa,” nia katak.
Eventu ne’e partisipa husi Primeiru-Ministru, Kay Rala Xanana Gusmão, Prezidente Parlamentu Nasionál, Maria Fernanda Lay, Deputada no Deputadu sira, antigu Deputada GMPTL, organizasaun feto inklui konvidadu sira seluk.
Durante serimónia, reprezentante feto aprezenta dansa kulturál uza vesturáriu taís ne’ebé reprezenta husi munisípiu hotu.
Mundu tomak inklui Timor-Leste kada tinan iha loron 08 Marsu selebra loron internasionál Feto.
Jornalista : Nelson de Sousa
Editora : Julia Chatarina
