Komunidade Lontas preokupa projetu instalasaun bee-moos seidauk finaliza
BOBONARU, 07 Marsu 2025 (TATOLI)—Lider komunitária no komunidade preokupa ho implementasaun projetu Instalasaun Sistema gravitasaun bee-moos iha aldeia Tasmíl, suku Lontas, postu administrativu Loloto’e, munisípiu Bobonaru, tanba Projetu Planu Dezenvolvimentu Integradu Munisipál (PDIM) ne’ebé hahú implementa iha Maiu 2024 ne’e seidauk finaliza.
Notísia Relevante: PAM Bobonaro hatuur fatuk dahuluk ba projetu bee-moos iha Tasmil-Lontas
“Besi monta hotu ona, komunidade mós asesu ona bee-moos, hela tanki mak to’o ágora seidauk monta lahtene tanba saida. Kompañia nunka fó imformasaun ruma kona-bá tanki ne’e, ami ezije ba kompañia atu aselera tanba tanki seidauk monta no bailoro ne’e bee araska,” Xefe suku Lontas, Duarte Costa, informa ba Agência Tatoli liuhusi WhatsApp, sesta ne’e
Ba kestaun ne’e, Diretór Planu Dezenvolvimentu Integradu Munisipál (PDIM), Autoridade Munisípiu Bobonaru, Rui Berre Mau Barros, rekoñese projetu ne’e la’o tarde tanba kompañia halo akizisaun materiál iha rai-li’ur.
Diretór Rui afirma, problema hansan ne’e akontese mós iha iha Projetu Konstrusaun Bee-Mos iha aldeia Oelaka, Boutal, suku Deu-det, postu administrativu Loloto’e.
“Ninia instalsaun sira ramata ona, hela de’it tanki, momentu dezeñu Planta no Kadernu Enkargu ka Bill Off Quantaty (BoQ) enjiñeiru sira prepara tanki ne’e hola iha Australia, maibé foin lalais ami telefoni ona kompañia ne’e, nia promete katak fulan-Marsu nia laran, sira tenke lori tanki mai monta para bee ne’e bele fornese ba komunidade,” nia dehan.
Projetu instalasaun sistema gravitasaun bee-moos iha Tasmil suku Lontas ne’e ho naruk metru 700, ne’ebé gasta osan rihun $200-resin no obra ne’e sei fornese bee-moos ba populasaun hamutuk 327 husi uma-kain 84.
Notísia Relevante: Uma-kain 84 iha Lontas la asesu bee-moos
Jornalista : Sergio da Cruz
Editór : Cancio Ximenes
