BOBONARO, 05 juñu 2023 (TATOLI)-Uma-kain 84 iha aldeia Tasmil, suku Lontas, postu administratrivu Lolotoe, munisípiu Bobonaro, defisil atu asesu bee-moos dezde tinan 2018.
Xefe suku Lontas, Alipio Belo, esplika suku ne’e iha aldeia tolu, maibé iha aldeia rua hanesan Piron Ozo mak asesu ona bee-mos hosi programa governu nian.
Notísia relevante: Joven na’in-13 hosi Lontas konklui ona formasaun jornalizmu bázika
“Ha’u komunidade aldeia Tasmil ho totál uma-kain 84 iha aldeia Tasmil mak la asesu bee-moos, daudaun ne’e uza bee-matan, dalaruma kanu besi ne’ebé ho kondisaun aat loos ona, maibé sira hanesan koko hadi’ak, aumenta ho materiál lokál hanesan au ka uza Ban dalan mak kesi, ho ida-ne’e mak sira aguenta to’o agora,” nia informa ba Tatoli, segunda ne’e.
Xefe suku Alipio hateten, problema ne’e akontese dezde tinan 2018 tanba kauza hosi dezastre naturál no iha tinan 2019 propoin ba Autoridade Munisípiu Bobonaro atu rezolve liuhosi Programa Dezenvolvimentu Integradu Munisipál (PDIM).
“Programa ne’e tau ona iha prioridade no pasa duni iha 2020 nian, ho ninia estimasaun, based orsamentu, buat sira ne’e kompleta tiha ona, ha’u rasik mós foti tiha nia arkiva ne’e iha munisípiu, maibé la konsege implementa programa ida ne’e tanbá nia orsamentu kuaze rihun $80 ne’e mak la halo,” nia haktuir.
Nia konsidera problema ne’e mak VIII governu la konsege rezolve iha suku Lontas, tanba ne’e rekomenda ba governu dasiak atu kontinua tau iha prioridade tanba bee-mos hanesan nesesidade bázika ne’ebé komunidade sira presiza iha moris loron-loron.
Notísia Relevante:Xefe suku Lontas agradese IGE normaliza estrada Ozo
Jornalista: Sérgio da Cruz
Editór: Evaristo Soares Martins
