Xefe suku Lontas agradese IGE normaliza estrada Ozo
BOBONARO, 13 dezembru 2022 (TATOLI)-Xefe suku Lontas, postu administrativu Lolotoe, munisípiu Bobonaro, Alípio Belo, agradese Institutu Jestaun Ekipamentu Apoiu Dezenvolvimentu Infraestrutura, Institutu Públiku (IGEADI, I.P, sigla portugés) ne’ebé normaliza ona estrada parte aldeia Ozo tanba kauza hosi rai-halai hafoin akontesimentu udan-boot iha loron 26 novembru ne’e.
Notísia relevante: Rai halai rezulta estrada Ozo Liga ba postu Lolotoe no Covalima grave
“Ha’u hanesan autoridade lokál sente kontente no agradese ba apoiu IGEADI, maske ami hato’o pedidu liuhosi via telefónika, maske konsege rezolve hosi apoiu Jornalista sira-nian konsege normaliza estrada ida-ne’e,” nia informa ba Tatoli, tersa ne’e.
Líder komunitária ne’e aprofunda, daudaun ne’e movimentasaun transporte públiku no privada hosi diresaun kapitál Maliana ba postu administrativu Lolotoe no munisípiu Covalima atu asesu ba atividade ekonomia no nesesidade sira seluk la’o normál hikas ona.
Maibé Ministériu Obra Públika presiza kontinua tau atensaun ba estrada refere.
“Presiza governu tau atensaun emerjénsiansia ida, atu labele difikulta movimentasaun, tanba IGE mai apoiu ne’e emerjénsia de’it, nia labele dura to’o tempu naruk, bainhira akontese udan boot mai nia aat fila-fali ona,” nia fó hanoin.
Tuir dadus estatístika munisípiu Bobonaro tinan 2020, postu administrativu Lolotoe iha aldeia 20, suku hitu, ho totál populasaun na’in 8,706 komposta hosi mane 4,810 no feto 3,936, ho totál xefe família 2.006.
Notisia relevante: APA Lolotoe kontaktu ona IGE normaliza estrada iha Ozo
Jornalista: Sérgio da Cruz
Editór: Evaristo Soares Martins
