Joven na’in-13 hosi Lontas konklui ona formasaun jornalizmu bázika
BOBONARO, 24 fevereiru 2023 (TATOLI) – Joven na’in-13 hosi suku Lontas, postu administrativu Lolotoe, munisípiu Bobonaro, kinta ne’e konklui ona formasaun jornalizmu bázika no administrasaun finansa ne’ebé oferese hosi ekipa Ministériu ba Asuntu Parlamentár no Komunikasaun Sosiál (MAPKOMS).
Formasaun durante loron-tolu ne’e realiza ho objetivu atu hakbiit foin sa’e sira-nia koñesimentu no abilidade iha área komunikasaun sosiál oinsá atubele jere sentru informasaun ne’ebé governu sei estabelese iha suku ne’e.
Notísia relevante: MAPKOMS sei harii sentru informasaun iha Lontas
“Ha’u-nia komunidade joven 13 pessoas mak partisipa, ohin remata ona, sira aprende kona-bá formasaun tipu tolu ka haat hanesan administrasaun finansa no área jornalizmu, camera man no editing video,” Xefe suku Lontas, Alípio Belo, informa ba ba Agência TATOLI, kinta ne’e.
Xefe suku Alípio agradese ba governu liuhosi MAPKOMS ne’ebé mak iha inisiativa di’ak fasilita ona formasaun ne’e atu nune’e joven sira mós bele iha kreatividade no dezenvolve-aan iha área mídia nian.
Tanba estabelesimentu sentru informasaun atu promove imformasaun lokál ne’ebé akontese no potensialidade iha suku ne’e ba públiku.
“Ha’u-nia observasaun ba iha formasaun ne’e di’ak, tanba ba futuru bele hasa’e sira-nia koñesimentu iha atividade jornalístika nian,” Alípio dehan.
Enkuantu suku Lontas iha aldeia tolu mak hanesan, Tas-Mil, Piron no Ozo ho totál abitante na’in-989 no xefe família hamutuk 215.
Notísia relevante: Suku Lontas devolve $11,400 ba BNCTL hosi subsídiu $200
Jornálista : Sérgio da Cruz
Editór : Evaristo Soares Martins
