DILI, 07 Marsu 2025 (TATOLI) – Papa Francisco ne’ebé internadu durante semana tolu iha Ospitál Gemelli, Itália, tanba sofre pneumonia bilaterál, daudaun iha ona kondisaun estavel no la aprezenta ona epizódiu insufisiénsia respiratória, haktuir nota husi Vatikanu iha loron 06 Fevereiru.
“Santu Padre kontinua ho benefísiu fizioterapia respiratória no motora. Parámetru emodinámiku no ezame raan kontinua estavel”, Vatikanu fó sai.
Haree ba etabilidade kuadru klíniku líder igreja Katólika nian ne’e maka médiku sira hateten katak sei fó sai buletin médiku nian to’o de’it sábadu.
“Ohin [06/03], Santu Padre dedika nia aan ba atividade serbisu durante dadeer no loraik deskansa no halo orasaun”, dehan.
Iha kondisaun ne’ebé kontinua hatudu progresu di’ak, iha Ospitál Gemelli, Papa Francisco liuhusi mensajen audio hato’o ba sarani sira iha Prasa Saun Pedro nia agradesimentu ba sarani Katólika ne’ebé reza ba nia rekuperasaun.
“Agradese husi kurasaun ba orasaun ba ha’u-nia saúde. Husi ne’e ha’u nafatin hamutuk ho imi”, Papa hato’o liuhusi mesajen audio.
Papa Francisco internadu iha ospitál dezde loron 14 Fevereiru, tanba sofre pneumonia bilaterál ne’ebé presiza tratamentu médiku kontinua.
Notísia relevante: CET husu sarani sira reza nafatin ba Papa Francisco
TATOLI
