DILI, 10 Marsu 2025 (TATOLI)—Komunidade iha área Surikmas, suku Bairru Pité, postu administrativu Don Aleixo, munisípiu Dili kuaze fulan-rua ona la asesu bee-moos.
“Iha Surikmas ne’e kuaze bee-moos atu fulan-rua ona ladun la’o, tanba ne’e husu Bee Timor-Leste (BTL) atu toma atensaun tanba komunidade iha área ne’ebá dalaruma lori masa jerigen ba buka bee,” Deputadu Bankada Governu husi Kongresu Nasionál Rekonstrusaun Timorense (CNRT), Virgílio Pereira hato’o iha reuniaun plenária Parlamentu Nasionál (PN), segunda ne’e.
Iha fatin hanesan, Deputada Bankada CNRT, Maria Angela Corubelo, preokupa tanba Dili nu’udar kapitál nasaun, maibé komunidade iha Bairru Pité, Delta, no Surikmas kontinua halerik ba bee-moos.
“Loloos Bee Timor-Leste sai ona empreza públika tenke fó nia servisu di’ak, maibé agora la’o nafatin iha fatin, ami tenta liga ona Bee Timor-Leste maibé resposta mak haree nafatin kanu no sei hadi’a nafatin, ita preokupa,” nia katak.
Notísia relevante : Komunidade Lontas preokupa projetu instalasaun bee-moos seidauk finaliza
Nune’e, reprezentante povu ne’e husu ba Vise-Ministru asuntu Parlamentár atu hato’o ba entidade kompetente atu tau atensaun.
“Tuir informasaun ne’ebé iha katak iha parte Kasnafar iha mota bee dalan intupidu tiha kuaze kilómetru neen, ita espera tempu badak bele rezolve. Tanba ami loroloron kuaze hola bee,” Deputada hato’o.
Vise-Ministru asuntu Parlamentár, Adérito Hugo da Costa, rejista preokupasaun sira no sei enkamiña ba entidade tutela hodi tau-atensaun.
Daudaun ne’e perfurasaun bee-moos iha kapitál Dili hamutuk 31 no sei instala tan foun balun ho objetivu komunidade hotu bele asesu bee-moos.
Jornalista : Nelson de Sousa
Editora : Julia Chatarina
