DILI, 11 Marsu 2025 (TATOLI)–Parlamentu Nasionál (PN), segunda ne’e, liuhusi sesaun plenária aprova rezolusaun kriasaun komisaun eventuál ba akompañamentu konflitu Sahara Osidentál ho unanimidade.
“Rezultadu votasaun afavór 54, kontra 0 no abstensaun 0, ne’ebé rezolusaun ne’e pasa ho unanimidade,” Prezidente Parlamentu Nasionál, Maria Fernanda Lay, fó sai iha sala plenária PN.
Sekretária Meza PN, Virgina Anabelo, lee sai testu projetu rezolusaun PN númeru 54/VI(2a) ne’ebé kria komisaun eventuál ba akompañamentu konflitu Sahara Osidentál, konsidera nesesáriu no oportunu kria komisaun eventuál foun ne’ebé akompaña evolusaun konflitu Sahara Osidentál. PN tuir termu artigu 92 konstituisaun no artigu 36 iha rejimentu Parlamentu.
Kompete ba komisaun ne’e akompaña divulgasaun no promosaun kauza Sarauí iha nível internu no esternu, mantein atualizasaun informasaun relativa deliberasaun sira asembleia jerál no rezolusaun konsellu seguransa Organizasaun Nasaun Unida (ONU) kona-ba konflitu Sahara Osidentál.
Aleinde ne’e, troka informasaun ho entidade no órganizasaun internasionál kona-ba konflitu Sahara Osidentál no akompaña atividade Embaixada Repúblika Demokrátika Sarauía iha Timor-Leste.
Notísia relevante : https://tatoli.tl/2021/10/18/pn-aprova-rezolusaun-fo-solidariedade-ba-povu-saara-ocidental/
Akompaña sein prejuizu kompeténsia ho instánsia seluk atividade husi husi organizasaun sira seluk no konferénsia internasionál kona-ba luta povu Sarauía kolobora fó perpektiva, konklusaun ka rekomendasaun ou rezolusaun.
Mantein no dezenvolve kontaktu ho komisaun Parlamentár povu Sarauía no solisita informasaun kona-ba konflitu Sahara Osidentál ba kualkér entidade ka sosiedade sívil nasionál no estranjeiru.
Promove reuniaun konjuntu ho komisaun Parlamentár sira seluk ho objetivu foti desizaun ba pozisaun Timor-Leste iha apoiu kauza Sarauía no sempre rona no entende nesesáriu membru Governu ho responsabilidade iha área negósiu estranjeiru no kooperasaun kona-ba evolusaun konflitu Sahara Osidentál no pozisaun Governu aserka solusaun atu rezolve.
Propór ba plenáriu PN entende aprovasaun rezolusaun kona-ba konflitu Sahara Osidentál aprezenta ba asinatura ba korespondente projetu rezolusaun.
Ba mandatu komisaun eventual ne’e funsiona durante periódu lejislatura no halakon ho nia termu ou iha loron ne’ebé hatudu rezolve konflitu Sahara Osidentál antes iha lejislatura tuir mai.
Kompozisaun komisaun eventuál kompostu Deputadu na’in-ualu indika husi bankada Parlamentár husi CNRT na’in-tolu, FRETILIN rua, PD ida, KHUNTO ida no PLP ida, ne’ebé kada Bankada Parlamentár indika mós membru suplente hanesan ho númeru efetivu.
Meza komisaun eventuál kompostu husi prezidente ida, vise prezidente ida no sekretáriu ida, eleitu maioria simples entre sira-nia membru.
Projetu rezolusaun ne’e aprezenta husi Deputadu proponente Duarte Nunes (CNRT), Armando dos Santos Lopes (PD), António Verdiál de Sousa (KHUNTO) no David Dias Ximenes ‘Mandati (FRETILIN).
Deputadu Duarte Nunes, fundamenta hamosu projetu ne’e tanba situasaun ne’ebé Embaixada Repúblika Saruía antes ne’e ba iha bankada espresa katak, presiza iha komisaun ida ne’ebé bele iha komunikasaun di’ak hamutuk halo analiza situasaun ne’ebé sira hasoru.
Jornalista : Nelson de Sousa
Editora : Julia Chatarina
