Labele halo monopólio iha distribuisaun materiál konstrusaun ba projetu PNDS

KOVALIMA, 11 Marsu 2025 (TATOLI) – Sekretáriu Estadu dezenvolvimentu lokál, Mateus W. dos Santos Talo  fó hanoin ba autoridade sira iha Kovalima katak labele halo monopólio, hodi estabelesimentu komersiál ida de’it mak halo distribuisaun ba materiál konstrusaun iha prosesu implementasaun projetu Programa Nasionál Dezenvolvimentu Suku (PNDS)  iha Munisípiu.

Tanba, tuir governante ne’e, nia parte rasik identifika, iha munisípiu balun,  loja Xina ida de’it mak distribui materiál konstrusaun durante implementa projetu PNDS.

“Ita presiza hadi’a no haree alterasaun dekretu-lei PNDS oinsá setór privadu bele partisipa labele hanesan munisípiu sira seluk  PNDS halo  monopólio husi Xina sira, kuidadu! Tanba  loja Xina  ida mak fornese materiál  ba  PNDS  ami identifika iha munisípiu balun akontese”, Mateus W. dos Santos Talo   hato’o iha nia diskursu bainhira abertura konsultasaun sidania iha Salaun AMC, ohin.

Ho nune’e  iha implementasaun  programa PNDS bainhira loja Xina ida de’it mak halo distribuisaun materiál konstrusaun oinsá mak bele hamoris setór privadu sira ho aktu ne’ebé akontese nia parte sei halo prosesu.

“Oinsá setór privadu atu moris  nune’e ita sei konvida sira mai atu rona mós sira husi  postu hitu iha Kovalima tanba setór privadu bele moris tuir orsamentu koloka iha suku ida-idak”,  nia informa.

Membru Governu ne’e konfirma katak nia parte sei halo diskusaun iha nívél polítika, oinsá atu halo alokasaun orsamentu tanba Ministériu Obra Públika (MOP), Ministériu Planeamentu no Investimentu Estratéjiku (MPIE) no Agrikultura atu ezekuta programa orsamentu menus husi rihun $ 500 se  di’ak liu entrega ba munisípiu.

“Iha nível polítika ami sei diskuti oinsá alokasaun orsamentu tuir lei Ministériu  sira hanesan MOP, MPIE  Agrikultura atu ezekuta programa  orsamentu iha munisipiu menus husi rihun 500 diak entrega mai  b aba munisipiu”, nia informa.

Ko’alia kona-ba  desentralizasaun buat hotu iha ministériu de’it, setór privadu mate, sirkulasaun osan no ekonómia la la’o  indikadór importante oinsá nível  polítika presiza  haree mós akordu interministeriál nune’e ba  futuru hodi fó ona kompeténsia,  maibé diretór sira tenke pasiénsia tanba konfiansa ezekusaun orsamentu entrega Ministériu ho osan rihun 500-resin.

Jornalista: Celestina Teles

Editór: Rafael Ximenes de A. Belo