BOBONARU, 11 Marsu 2025 (TATOLI)—Ministériu Asuntu Kombatente Libertasaun Nasionál (MAKLN) kongratula no apresia ba kombatente sira iha munisípiu Bobonaru, tanba iha ambitu publikasaun lista editál veteranu no kombatente rejistadu 2009 to’o ohin loron la’o ho ho di’ak, maske balun la satisfás ho rezultadu ne’e.
Notísia Relevante: Provizóriu, MAKLN rejista reklamasaun no kontestasaun rihun 11-resin
“Ha.u hakarak fó parabéns ba munisípiu Bobonaru, liuliu ba kombatente rejistadu 2009, ami sente situasaun iha Maliana la’o di’ak, hakmatek, rona malú, la hanesan iha fatin balun vinga malu, hotu-hotu hakarak hatudu oin para sai iha media. Ita ne’e sai husi koridór ida, ita mak sai hansan opozisaun ba malu, ne’e labele eziste iha Maliana,” Reprezentante Ministru Asuntu Kombatente Libertasaun Nasionál no Sekretáriu Rejiaun IV, Jorge Martins ‘Morin’, hato’o pozisaun ne’e bainhira halo inaugurasaun ba edifisíu foun Konselu Munisipál Kombatente Libertasaun Nasionál, Munisípiu Bobonaru, segunda ne’e.
Tuir Morín, bainhira kombatente ne’ebé la satisfás ho rezultadu ne’e, lei fó dalan no ema hotu iha direitu atu hato’o reklamasaun no kontestasaun.
“Hakilar malu ita lahetan solusaun ida. Hakarak hetan solusaun só tuur hamutuk, ó-nia sala iha ne’ebé no ha’u–nia sala iha ne’ebé, ko’alia ba malu rezolve hamutuk mak ita halo konferénsia imprensa. La’ós seidauk iha rezultadu ita ba halo konferénsia ne’e hanesan ita ba soke malu de’it, sei lahetan solusaun,” nia dehan.
Nia husu ba veteranu no kombatente sira atu haketak tiha interrese privadu ho partidu no komunga nafatin espíritu rezisténsia no prinsipiu luta ba libertasaun nasionál.
Iha era independénsia veteranu no kombatente sira mak tenke sai ezemplu ba pás no establidade, tanba veteranu mak nu’udar na’in no riin ba nasaun.
“Uluk sigaru lolon ida fuma hamutuk, ikus mai tanba A ou B tanba kadeira, sigaru slop ida ema ida mesak fuma, sira seluk nonton de’it, depois dehan ha’u mak halo no ida-ne’ebá la halo. Rai-lulik no matebian sira-ne’ebé mate, sira haree ita. Tenke tau iha fuan ho laran hadomi, ita-nia maluk rezisténsia hanesan ita nia-aan rasik. La’ós ko’alia de’it iha ibun no ulun, tau iha fuan no domin, ne’e mak loos. Tanba, funu ba libertasaun la’ós ema ida mesak de’it, ita hotu, servisu loron ida, semana ida, fulan ida ne’e nia mós kontribui. Tanba, nia masin-midar ho kafé ita iha ai-laran mós hemu,” nia hateten.
Enkuantu, totál lista Kombatente Libertasaun Nasionál rejistadu 2009 iha munisípiu Bobonaru hamutuk 10,966, ne’ebé kompostu husi postu administrativu Atabae 1,219, Balibo 902, Bobonaru 3,997, Kailaku 1,425, Loloto’e 1,634 no Maliana 1,789.
Notisia Relevante:
Jornalista : Sergio da Cruz
Editór : Cancio Ximenes
