DILI, 11 Marsu 2025 (TATOLI) – Komisaun Funsaun Públika (KFP) tinan oin implementa polítika reforma obrigatóriu ba funsionáriu públiku sira iha administrasaun públika.
Prezidente KFP, Agostinho Letêncio de Deus, dehan, idade reforma ne’ebé ho idade 60-resin hamutuk 4.752.
“Liga idade nian, totál funsionáriu públiku neʼebé ita rejista ne’e funsionáriu ne’ebé liu ona idade 60 até 89,” Prezidente KFP, Agostinho Letêncio de Deus, hateten.
Situasaun forsa traballu iha kontestu funsaun públika ba tinan-2023 nian, tuir dadus atualizasaun iha baze SIGAP KFP rejista funsionáriu permanente inklui ajente administrasaun públika ativu ho totál 39.380, neʼebé kompostu husi feto 14.115 no mane 25.265.
Husi númeru ne’e funsionáriu permanente 33.004, ajente administrasaun públika 6376.
Prezidente Institutu Nasionál Seguransa Sosiál (INSS), Arlindo Pinto, hatete, INSS hein dadus funsionáriu reformadu husi Komisaun Funsaun Públika (KFP) nune’e bele halo pagamentu.
“Funsionáriu reformadu to’o agora ita seidauk hetan dadus husi nível ministériu sira-ne’ebé mak ninia funsionáriu sira atu reforma, mas husi parte seguransa sosiál prontu atubele halo pagamentu no atendimentu funsionáriu sira-neʼebé mak atu reforma. Purtantu dadus funsionáriu hira mak atu reforma ami hein de’it dadus husi KFP, no liña ministeriál sira-ne’ebé submete dadus mai”, nia dehan.
INSS prontu koopera no bainhira lista reformadu submete ona mai INSS nune’e bele halo pagamentu.
“Parte seguransa sosiál prontu atu halo pagamentu no ami hein de’it dadus husi liña ministeriál hodi halo prosesu pagamentu,” nia dehan.
Komisária KFP, Anita Tavares Oliveira de Jesus, esplika, oras ne’e serbisu koordenasaun ho Institutu Nasionál Seguransa Sosiál no Ministériu Finansa atu haree prosesu funsionáriu idade reformadu sira-ne’e tanba dekretu-lei ne’e iha ona maibé Komisaun sei haree tanba kuandu atu reforma ema ne’e tenke ho dignu.
“Funsionáriu reformadu ne’ebé haree husi instituisaun no ministériu hotu-hotu kuaze rihun haat inklui ho profesór. Bainhira loos ona no implementa mak Institutu Nasionál Seguransa Sosiál mak sei halo prosesu hotu ligadu ho pagamentu. Tanba funsionáriu ida reforma nia direitu sei ba iha-ne’ebá. Nune’e tinan oin ita hahú implementa lei obrigatóriu reforma ne’e, ne’ebé hahú ho idade 65 ba leten”, nia dehan iha Timor Plaza, tersa ne’e.
Jornalista: Osória Marques
Editór: Evaristo Soares Martins
