DILI, 12 Marsu 2025 (TATOLI)–Prezidente Parlamentu Nasionál (PPN), Maria Fernanda Lay, kuarta ne’e, simu vizita kortezia husi Embaixadór Angola iha Timor-Leste, José Andrade de Lemos.
“Ne’e hanesan vizita kortezia, foin primeira vez atu mai komprementa hanesan país irmaun bainhira sira loke Embaixada iha ne’e iha tinan kotuk, mai fó hatene katak sira loke ona. Ita espera ho abertura Embaixada iha Timor ita laiha ona problema vistu bainhira delegasaun ruma husi Timor-Leste bá Angola, ida-ne’e fasilita,” PPN hato’o hafoin ramata sorumutu iha sala konferénsia Parlamentu Nasionál (PN).
Nia hateten, oportunidade ne’e nu’udar país irmaun haree saida mak bele serbisu hamutuk iha kooperasaun Asembleia Parlamentár Komunidade Ko’alia Lian Portugés (AP-CPLP).
“Iha tinan ne’e ita sei iha atividade jogu CPLP iha Timor-Leste, Angola hanesan país membru sei partisipa mós nune’e hein katak ita bele organiza ho di’ak. Iha CPLP nia laran ita iha kooperasaun la’o hela ho Portugal no Brázil, ho nasaun sira seluk ita sei haree ida-ne’ebé mak ita bele opta, tanba nasaun rua ne’e mak tuan liu kompara ho nasaun membru sira seluk,” nia akresenta.
Notísia relevante : Timor-Leste ho Angola asina akordu vistu livre ba passaporte servisu no diplomátiku
Iha fatin hanesan, Embaixadór José Andrade de Lemos, konsidera enkontru ne’ebé akontese iha ámbitu relasaun ezistente ne’ebé di’ak entre nasaun rua hodi aborda kestaun sira iha nível CPLP no relasaun entre nasaun rua.
Diplomata ne’e dehan, Embaixada nakloke hodi fó atendimentu fasilita vistu ba sidadaun timoroan ne’ebé hakarak atu bá Angola.
“Iha ámbitu kestaun vistu, Timor-Leste nu’udar nasaun membru CPLP iha ona akordu jurídiku asina ona desde esesaun iha primeira faze esesaun vistu ba misaun ofisiál, pasaporte serbisu no diplomátiku ida-ne’e ho forma graduál, portantu agora loke ba sidadaun autente pasaporte diplomátiku ou serbisu desde iha vizita ofisiál, kona-ba vistu ita fasilita. Ba restante nível turizmu no nível seluk tan ho razaun atu vizita Angola, eziste iha portál, portantu ita-nia fasilitasaun vistu ba nível sira hotu abertu, laiha difikuldade no prinsipalmente ba sidadaun ho nasionalidade timorense no membru CPLP,” nia tenik.
Governu disponibliza antigu edifísiu CPLP iha Kampu Alor-Dili ba estabelesimentu Embaixada Angola iha Timor-Leste.
Jornalista : Nelson de Sousa
Editora : Julia Chatarina
