DILI, 12 Marsu 2025 (TATOLI)— Komandante Pesoa no Formasaun Superintendente Xefi Polísia, Arquimino Ramos, hateten Komandu Polísia Nasionál Timor-Leste (PNTL) altera ona kritériu teste fíziku ba partisipasaun feto iha rekrutamentu PNTL ba tinan ne’e.
Tuir Arquimino katak normalmente kuandu iha rekrutamentu, kuota ba feto ne’e pursentu 15, maibé dalaruma la atinje kuota tanba kritériu rekrutamentu ba feto rigór tebes. Tanba ne’e mak rekrutamentu iha tinan ne’e Komandu PNTL deside altera tiha kritériu balun nune’e fó oportunidade feto bele partisipa másimu iha rekrutamentu.
“Agora daudaun iha kritéria teste fíziku ba partisipasaun feto ita altera ona buat balun no ita submete ona kritériu sira-ne’e ba Komandante Jerál PNTL no sei lori bá Ministru Interiór atu hasai diploma ministeriál ida kona-ba rekrutamentu nian,” Arquimino hateten ba jornalista sira iha edifísiu Komandu Jerál PNTL, Kaikoli, kuarta ne’e.
Nia esplika, teste fíziku ba feto sira kompara ho rekrutamentu iha tinan sira liubá ne’e hale’u kampu dala sanulu maibé agora redús bá hitu, bomba rai (push up) uluk dala 20 no agora redús bá 10.
Notísia relevante: Komandu PNTL hakarak rekruta membru PNTL ho transparénsia
“Ita hamenus kritéria balun tanba ita halo analiza iha kursu sira liubá ne’e, maioria feto lakon iha ezame fízika. Tanba ne’e mak ita redús kritériu balun para hasa’e uitoan feto iha rekrutamentu husi kuota pursentu 15 (ekivale ema na’in-80) agora sa’e ba pursentu 17,” nia haktuir.
Nia esplika katak alterasaun sira-ne’e mai husi pedidu UN Women no akonsellamentu husi Sekretaria Estadu Igualdade no Inkluzaun ne’ebé husu Komandu Jerál PNTL no Ministériu Interiór atubele hasa’e númeru feto iha rekrutamentu PNTL.
Hatán ba kestaun ne’e, Ministru Interiór, Francisco da Costa Guterres, esklarese Ministériu sempre oferese kuota ba feto nune’e feto tenke tama iha rekrutamentu ne’e.
Tanba ne’e, nia enkoraja feto tenke konkore ba vaga rekrutamentu ne’ebé sei halo iha tempu badak.
Nia dehan, Ministériu Interiór sei diskute kle’an kona-ba atu oferese kuota hira ba feto iha rekrutamentu.
Jornalista: Natalino Costa
Editór: Xisto Freitas da Piedade
