DILI, 12 Marsu 2025 (TATOLI)—Embaixadór Angola iha Timor-Leste, José Andrade de Lemos, informa, Prezidente Repúblika Angola, João Lourenço, sei adia vizita mai Timor-Leste.
Tuir ajenda antes ne’e, Prezidente Angola sei vizita Timor-Leste durante loron-tolu, ho razaun vizita hodi hametin relasaun bilaterál entre nasaun rua.
“Vizita prevista iha loron 09 to’o 11 marsu maibé ho razaun balun, adia kalendáriu ne’e, antesipadamente informa ona autoridade timoroan,” Embaixadór José Andrade hateten hafoin hasoru malu ho Prezidente Parlamentu Nasionál, Maria Fernanda Lay, iha Parlamentu Nasionál, kuarta ne’e.
Notísia relevante : Prezidente Angola sei vizita Timor-Leste iha 09-11 Marsu
Nia hateten, Angola agora serbisu hamutuk hela ho autoridade Timor-Leste liuhusi nível diplomátiku hodi marka fali kalendáriu fiksu ne’ebé sei haree mós ho ajenda Xefe Estadu no Xefe Governu Timor-Leste nian.
Jornalista : Nelson de Sousa
Editora : Julia Chatarina
