DILI, 17 Fevereiru 2025 (TATOLI)—Ministru Negósiu Estranjeiru no Kooperasaun (MNEK), Bendito Freitas, hateten Prezidente Angola sei vizita Timor-Leste durante loron tolu (3) hahú husi loron 09-11 marsu 2025 hodi hametin relasaun bilaterál entre nasaun rua (2).
Notísia Relevante: Horta ho Prezidente Angola diskute kooperasaun bilaterál
“Prezidente Angola João Lourenço sei vizita Timor-Leste, ida-ne’e hanesan momentu istóriku hodi hamtein relasaun billaterál entre nasaun rua,” Ministru Bendito hateten ba jornalista sira iha edifisiu MNEK Dili, segunda ne’e.
Nia dehan, vizita ne’e importante tebes ba Timor-Leste no hanesan nasaun membru Komunidade Nasaun Ko’alia Lian Portugés (CPLP-sigla Portugés) tenke fahe esperiénsia ba malu hodi hametin relasaun di’ak entre nasaun rua.
“Angola nasaun amigu ida ita-nian, iha tempu luta sira mós fó apoiu lubuk ida mai ita. Vizita ne’ebé Prezidente Angola halo foin dala uluk ne’ebé signifikativu tebes hodi hametin lasu amizade entre ita ho sira,” Bendito tenik.
Durante estadia iha Timor-Leste, Prezidente Àngola sei hasoru malu ho nia ómologu Prezidente Repúblika, José Ramos Horta no sei partisipa mós atividade balun ne’ebé organiza husi Governu Konstitusionál da-sia (IX).
Relasaun billaterál Timor-Leste ho Angola
Antes ne’e, husi loron 07 to’o loron 10 fulan-jullu tinan 2024, Ministru Negósiu Estranjériu no Kooperasaun, Bendito Freitas, akompaña Prezidente Repúblika, José Ramos Horta, hala’o vizita Estadu ba Angola, ho objetivu atu hametin relasaun bilaterál entre Timor-Leste no Angola.
Delegasaun Timor-Leste nian simu iha Aeroportu Internasionál Luanda husi Ministru Negósiu Estranjeiru Angola, Téte António, no husi Embaixadór Angola iha Timor-Leste, José Andrade de Lemos.
Vizita ida-ne’e, inklui atividade no sorumutu oioin ho altu nivel ne’ebé foka liu kooperasaun entre país rua.
Iha loron 08 fulan-Jullu 2024, Ministru Bendito Freitas partisipa iha palestra ida-ne’ebé hato’o husi Prezidente José Ramos Horta iha Akademia Diplomátika “Venâncio de Moura”, ne’ebé destina ba membru akademia diplomátika angolana no figura relevante sira-seluk. No, iha loron hanesan, Xefe Estadu ho Governante ne’e simu iha Asembleia Nasionál.
Nune’e mós, iha loron 08 fulan-Jullu, Ministru Bendito Freitas no Prezidente José Ramos Horta presta omenajen iha Monumentu Memoriál António Agostinho Neto, hodi rekoñese importánsia istóriku no kulturál husi fundadór nasaun angolana nian ne’e.
Momentu ida-ne’ebé signifikativu liu iha vizita ne’e mak asina akordu izensaun vistu ba titulár pasaporte servisu no diplomátiku entre Timor-Leste no Angola.
Akordu ne’e, asina husi Ministru Negósiu Estranjeiru husi país rua ne’e, sei fasilita mobilidade diplomata no sei hametin kooperasaun bilaterál.
Iha okaziaun ne’e, asina mós memorandu entendimentu ida hodi estabelese kooperasaun iha área konsulta polítika diplomátika, nune’e mós akordu ida entre Akademia Diplomátika “Venâncio de Moura” no Sentru Estudu Diplomátiku Timor-Leste.
Durante vizita, Ministru Bendito Freitas akompaña Xefe Estadu iha inaugurasaun ofisiál Embaixada Timor-Leste iha Angola. Serimónia ne’e marka pasu importante ida iha relasaun diplomátika, ne’ebé simboliza amizade no kooperasaun ne’ebé duradoura (metin liután) entre país rua ne’e.
Ministru Bendito Freitas partisipa mós iha vizita ida ba Institutu Superiór Siénsia Polisiál no Kriminál (ISCPC) iha Angola, iha ne’ebé diskute ona kolaborasaun posivel iha área formasaun no seguransa.
Vizita ne’e ramata ho desizaun atu kria komisaun konjunta ida entre Timor-Leste ho Angola, ne’ebé sei envolve ekipa téknika ida husi liña ministeriál sira, atu diskute no promove kooperasaun iha setór estratéjiku sira hanesan petróleu, turizmu, agrikultura no formasaun rekursu umanu. Komisaun ida-ne’e sei serbisu hodi trasa planu asaun ida-ne’ebé sei fó benefísiu ba país rua.
Notísia Relevante: Timor-Leste ho Angola asina akordu vistu livre ba passaporte servisu no diplomátiku
Jornalista : Hortencio Sanchez
Editor : Cancio Ximenes
