BOBONARU, 12 Marsu 2025 (TATOLI)—Sentru Saúde Komunitária Postu Administrativu Balibo, Munisípiu Bobonaru, hahú husi Setembru 2024 no Janeiru to’o Marsu 2025, konsege halo tratamentu saúde ba didadaun Indonézía na’in-tolu (3) tanba asidente no sofre moras durante vizita fámilia bainhira partisipa serimónia kulturál iha Timor-Leste.
Notísia Relevante: Indonézia oferese ró ambulánsia ida ba MS
Xefe Sentru Saúde Komunitária Postu Administrativu Balibo, Zacarias Fernandes, esplika atendimentu ne’ebé fó ba Sidadaun Indonézía hirak ne’e ho gratuita tanba atu prevene transmisaun moras tuberkolozu (TB) no seluk tan labele hada’et ba populasaun Timor-Leste no kona-ba atendimentu kazu asidente tanba kestaun umanu.
Nia dehan, sidadaun Indonézía feto na’in-tolu (3) ne’e mai ho kazu TB no ssidente no sidadaun hirak ne’e tama husi dalan legál utiliza pasaporte.
“Ita-nia Sentru Saúde Balibo ne’e iha área fronteira, depois sira iha sorin mós ita família, ezemplu fulan hitu liubá alin ida mai husi Soe NTT, nia ataka iha ne’e, entaun Sentru Saúde ba foti halo ezaminasaun nia hetan Tuberkuloza (TB) pozitivu. Entaun, Sentru Saúde tenke halo tratamentu preventivu ba nia fó ai-moruk durante fulan rua, depois lanjutan ne’e ba hemu fali iha So’e. Agora, foin dadauk sira manda fali foto mai ne’e nia saudavél ka di’ak ona,” nia informa ba jornalista sira iha Maliana, kuarta ne’e.
Zacarías afirma, kona-ba programa TB parte Saúde Munisípiu Bobonaru halo koordenasaun servisu ho Saúde Atambua no Kabupaten seluk iha NTT hodi fó atendimentu gratuita.
Kona-ba tratamentu kazu HIV/SIDA, xefe sentru saúde ne’e deklara katak sidadaun Indonézía ho Timor-Leste ne’ebé hela iha fronteira bele asesu ai-moruk iha kualker fasilidade públika, tanba rua iha ona akordu.
“Karik pasiente HIV/AIDS mai iha ne’e mak sira-nia ai-moruk falta, entaun ita bele fó loron ida rua ba sira hemu, ne’e para sira fila-fali hodi foti fali ai-moruk. Hanesan mós ita-nia populasaun ho kazu HIV/SIDA ba iha ne’ebá mak la lori ai-moruk bele ba fasilidade saúde iha Atambua ou iha ne’ebé de’it, sira bele foti ba hemu loron ida rua,” nia dehan.
Entretantu, durante ne’e Sentru Saúde Balibo seidauk rejistu sidadaun Indonézia mai halo konsultasaun jerál.
Notísia Relevante: Saúde Munisipál sei distribui ai-moruk Albenzadole ba labarik iha Bobonaro
Jornalista : Sérgio da Cruz
Editór : Cancio Ximenes
