DILI, 13 Marsu 2025 (TATOLI)- Autoridade Munisipál Dili (AMD) arrekada reseita ba Kofre Estadu alende estasionamentu inklui mós publisidade liuhusi espasu publisitáriu sira.
Sekretáriu Asuntu Sosiál no Organizasaun Munisípiu Dili (SECAM, AS),
hateten aleinde estasionamentu mak hetan rendimentu maibé publisitáriu mós investe rendimentu maka’as liu ba Governu.
Maneira kobransa husi publilsitária ne’e la’ós entrega osan direta mai iha AMD, maibé sei selu diretamente iha banku, foin ne’e mak sei entrega resibu ba AMD hodi autoriza halo publisidade ba kuadru, banner (efeitu) iha fatin públiku; buat hotu iha ninia regra rasik.
“Ida publisidade ne’e la’ós sira fó osan direta mai ita, la’e, sira mai foti de’it resibu iha ita no sira na’in lori ba selu iha banku, depois mak sira lori fali resibu banku ne’e mai hatudu fali ba ita, ne’ebé buat hotu la’o tuir ninia prosedur”, Sekretáriu ne’e hateten ba jornalista TATOLI, hafoin formasaun iha salaun Lalini-larigutu CNE, Dili, ohin.
Kuadru ba publisidade ne’e rasik iha folin ne’ebé mak lahanesan, no sempre iha ninia determinasaun loron publisidade bazeia na montante ne’ebé mak hakarak halo publisidade iha fatin púliku, maibé presu ba Governu no empreza sira hanesan de’it.
“Ida publisitária ne’e mós iha rendimentu boot tebetebes, ne’e atu iha ita-nia kompaña no ministériu ne’e ita obrgatóriu tanba ne’e taxa Estadu ninian, folin hanesan laiha diferente, laiha diskriminasaun”, nia hateten.
Reseita ne’ebé mak AMD hetan husi publisitáriu sei entrega diretamente ba Ministériu Finansa, tanba bazea ba konta bankária iha AMD ne’e rasik fó limitasaun ba loron tolu de’it no tenki transfere liu ba Finansa.
“Sim, reseita husi publisidade ne’e autoridade tenki entrega ba finansa, tanba iha ita-nia konta bankária ne’e lasala limite de’it loron tolu de’it, loron tolu ne’e orsamentu iha autoridade ne’e tenki transfere liu ba Ministériu Finansas”, nia hatutan.
Enkuantu kompeténsia ne’ebé mak boot hodi tau matan kona-ba publisitáriu ne’e rasik, Autoridade Munisipál Dili, sempre iha diresaun ida mak liuhusi jestaun merkadu mak sei toma konta kona-ba publisitária iha Fatin Públiku.
Jornalista: Alexandra da Costa
Editór: Rafael Ximenes de A. Belo
