DILI, 13 Marsu 2025 (TATOLI) – Universidade Nasionál Timor Lorosa’e (UNTL) esklui ona estudante inativu hamutuk 8.850 husi sistema akadémiku.
Ba asuntu ne’e, Reitór UNTL, João Soares, entrega ona lista estudante la ativu sira husi tinan 2000-2012 ba dekanu sira hodi haree, bainhira estudante sira ne’e bá halo fali inskrisaun, maibé naran iha lista, sei laiha legalidade.
“Ita esklui ona husi sistema akadémiku, karik estudante sira-ne’e mai filafali ho dokumentu kompletu mós ita sei la simu. Sira hakarak kontinua fali estudu iha UNTL tenke tuir fali prosesu normál hanesan estudante foun sira”, reitór hatete liuhusi nota ne’ebé TATOLI asesu husi mídia UNTL, ohin.
Dekanu Fakuldade Edukasaun Arte no Umanidade (FEAH, sigla portugés), Teodoro Soares hatete, fakuldade simu ona lista eliminasaun estudante no kuandu hakarak eskola fali, tenke tuir prosesu normál.
“Tanba ita fó ona tempu tinan rua, balun konsege mai, sira seluk ne’ebé la mai tama ona iha lista eliminasaun”, dekanu ne’e dehan.
Lista eliminasaun estudante sira ne’e entrega ba Dekanu Fakuldade Direitu, José Tomás Alves, Fakuldade Ekonomia no Jestaun, Filipe Mendes Pereira, no Dekanu FEAH, Teodoro Soares.
Lembra katak UNTL, iha tinan 2022-2024, fó oportunidade ba nia alunu sira ne’ebé la ativu hodi halo readmisaun no iha estudante balun mak konsege filafali ba kontinua estudu no seluk deziste husi universidade.
Notísia relevante: UNTL nafatin fó oportunidade ba estudante sira ameasadu deziste atu bá rejistu
Jornalista: Osória Marques
Editora: Maria Auxiliadora
