UNTL nafatin fó oportunidade ba estudante sira ameasadu deziste atu bá rejistu
DILI, 17 outubru 2023 (TATOLI) – Estudante 25.021 ne’ebé tama iha lista dropout Universidade Nasionál Timor Lorosa’e (UNTL) iha nafatin oportunidade atu halo readmisaun, maibé tuir Vise-Reitór Asuntu Akadémiku no Garantia Kualidade, Samuel Freitas, foin iha estudante 360 mak halo fali rejistu.
Samuel Freitas afirma katak universidade kontinua monitoriza prosesu regularizasaun matríkula ne’ebé maka estudante sira halo ona, maibé haree katak husi prosesu ne’e rasik seidauk atinje alvu ne’ebé maka UNTL hakarak tanba daudaun iha ona outubru, maibé estudante ne’ebé halo prosesu pré-inkrisaun ne’e seidauk to’o rihun.
Ne’e duni parte universidade husu nafatin ba estudante sira ne’ebé iha interese hakarak kontinua sira-nian estudu bele kumpre filafali prosesu hotu.
UNTL loke prosesu ida ne’e tanba hakarak atu hadi’a fali nia sistema sira, nune’e estudante ne’ebé maka deside lakohi kontinua estuda bele hetan ona dropout.
“Ida ne’e polítika ida ne’ebé UNTL tenke halo atu elimina naran sira ne’ebé maka iha maibé ema laiha. Tama ba 2024 mak foin bele hatene loloos nia implementasaun. Estudante ne’ebé maka tama iha lista dropout sei liuhusi desizaun koletiva ida. Nune’e polítika universidade nian sei implementa sistema pré-inskrisaun ne’e sei to’o tinan oin 2024. Desizaun preskrisaun ne’e sei foti husi reitoria ka orgaun másimu deliberativu liuhusi konsellu jerál UNTL nian”, katak.
Bainhira prosesu preskrisaun ne’e remata ona, estudante sira ne’ebé maka la rejistu sai objetu ida hodi tau iha desizaun ka konsiderasaun ida kona-ba dropout.
“Tanba desizaun sira ne’e hotu hatuur ona iha regulamentu akadémiku ne’ebé prevee iha artigu désimu kona-ba rejime preskrisaun ho lian inglés katak droupout ba matrikula”, esplika.
Rekorde katak estrutura UNTL fó sai ona liuhusi konferénsia imprensa, iha setembru 2022, katak universidade fó tempu fulan 18, hahú husi 01 setembru 2022 to’o 28 fevereiru 2024 ba estudante inativu sira atu halo inskrisaun hodi kontinua estudu.
Notísia relevante: Estudante 264 ne’ebé ameasadu deziste hosi UNTL halo ona reinskrisaun
“Kuandu tama ona marsu 2024 konsidera dropout ona. Sira tenke hato’o pedidu mai reitoria, hafoin retoria rasik halo koordenasaun ho fakuldade ba kursu ne’ebé maka sira hili. Tanba ne’e, ha’u apela ba antigu alunu ka estudante inativu sira sei hakarak filafali mai UNTL atu kontinua hikas kursu bele halo pedidu mai reitoria, nune’e universidade bele regulariza sira-nia situasaun”, Reitór UNTL, João Soares Martins, aviza.
UNTL rasik durante ne’e iha regulamentu ne’ebé hatuur ona iha artigu 10 versaun 2013, ne’ebé hateten prosedimentu kona-ba implementa rejime dropout fixu ona.
Notísia relevante: UNTL fó tempu fulan-18 ba estudante inativu 17.509 halo inskrisaun
Jornalista: Tomé Amado
Editora: Maria Auxiliadora
