DILI, 13 Marsu 2025 (TATOLI)—Prezidente Parlamentu Nasionál (PPN), Maria Fernanda Lay, simu audiénsia husi Embaixadór Malázia iha Timor-Leste, Dato Amarjit Sarjit Singh.
Enkontru ne’e akompaña husi Sekretária Meza, Deputada Virgínia Ana Belo no Prezidente Komisaun B ne’ebé trata asuntu Negósiu Estranjeiru, Defeza no Seguransa, Deputadu Domingos Augusto ‘Deker’.
Durante enkontru, parte rua aborda asuntu hametin lasu amizade iha nível Parlamentár liuhusi grupu amizade Parlamentu nasaun rua nian.
Diskute mós kona-ba apoiu Malázia mai Timor-Leste ba adezaun Asosiasaun País Sudeste Aziátiku (ASEAN, sigla inglés), ne’ebé sei haree liubá iha área apoiu formasaun profisionál tékniku ba Ministériu Negósiu Estranjeiru no Kooperasaun (MNEK) no ministériu relevante sira.
Notísia relevante : Malázia prontu lori TL ba ASEAN durante mandatu, Laos PDR konkorda total
Aleinde ne’e, ko’alia mós kona-ba Vise-Prezidente Parlamentu Malázia nia planu vizita mai Parlamentu Timor-Leste iha fulan juñu tinan ne’e.
“Hato’o agradesimentu ba Parlamentu Malázia nia apoiu totál ba Timor-Leste nia adesaun ba ASEAN bainhira iha eventu Konferénsia internasionál Asean Inter-Parlamentar Assembly (AIPA) nian iha Lao People’s Democratic Republic (LPDR),” PPN hato’o durante enkontru.
Iha biban ne’e, PPN husu atu Deputadu no tékniku sira husi inklui iha formasaun profisionál ne’ebé sei organiza, nune’e bele ajuda dezenvolve koñesimentu kona-ba lejizlasaun relasiona ho adezaun ba ASEAN.
Jornalista : Nelson de Sousa
Editora : Julia Chatarina
