PNDS Kovalima fó prióridade implemeta projetu 31 iha área setoriál lima
KOVALIMA, 13 Marsu 2025 (TATOLI) – Programa Nasionál Dezenvolvimentu Suku (PNDS) Kovalima, iha 2025 ne’e fó prióridade implementa projetu 31 área setoriál lima, iha munisípiu Kovalima.
Diretór PNDS Munisípiu Kovalima, Pedro de Araújo Gomes informa, implementasaun projetu fó prióridade ba setór lima ne’e mak hanesan Saúde, Edukasaun, Agrikultura , Obra Públika, inklui bee no saneamentu.
“Iha ita-nia planu elobora iha Planu Asaun Anuál 2025 projetu hamutuk 66 maibé bazeia ba orsamentu ita-nia projetu hirak ne’e ita la implementa hotu, ita implementa kada suku implementa projetu ida maibé postu Suai suku Labarai implementa projetu rua”, Pedro de Araújo Gomes, relata ba TATOLI, iha nia servisu fatin, ohin.
Ho nune’e dirijente ne’e dehan, iha 2025 ne’e PNDS Kovalima implementa de’it projetu 31 iha suku 30 Postu administrativu hitu hanesan Fatululik, Fatumea, Fohorem, Tilomar, Maukatar, Suai no Zumalai.
Implementa projetu 31 ne’e barak liu implementa projetu setór obra públika tanba implementa projetu 16, iha setór saúde implementa projetu tolu, edukasaun iha projetu lima, agrikultura iha projetu tolu, bee no saneamentu implementa projetu haat.
Implementa projetu ba setór Obra Públika proposta mai husi komunidade barak ne’e, estrada beton, konstrui ponte ki’ik no drainajen nune’e bainhira tempu udan la iha tahu no atu labele estraga estrada sira .
“Prosesu atu implementa projetu iha 2025 ne’e ita halo levantamentu dadus no halo dezeñu ho BoQ finaliza ona hein atu tama iha faze aproviziomanetu maibé daudaun ne’e ita prepara ba halo planiamentu 2026”, nia dehan.
Tan ne’e ba étapa ba dahuluk fó sai informasaun hodi rejistu empreza lokál eziste iha Kovalima ba iha suku ida-idak bainhira empreza ne’ebé nia dokumentu kompletu bele rejistu suku ida-idak ne’ebé sei akontese iha semana da haat Marsu ne’e nune’e implementa projetu PNDS 2025 iha Abríl ne’e.
Implementasaun projetu PDNS, empreza sira fornese de’it materiál konstrusaun ne’ebé ho nia kritériu mak durante loron tolu bainhira fasilitadór tékniku fó pedidu fornese materiál ba empreza bainhira empreza dokumentu kompleta, enjiñeiru no kontabilista munisípiu konfirma iha terrenu empreza referida sai hanesan manan na’in entrega pedidu fornese materiál.
Hafoin entrega pedidu fornese materiál liu loron hitu mak empreza la fornese kompeténsia xefe suku bele konvoka reuniaun konsellu suku hapara empreza referida.
Bazeia ba regra implementa projetu PDNS ho nia durasaun tempu durante fulan tolu to’o fulan neen maibé tanba empreza fornese materiál tarde nune’e implementasaun projetu la tuir durarasaun tempu ne’ebe mak defini ona.
Orsamentu implementa ba projetu 31 ne’e hamutuk $ 1,045,713 husi orsamentu ne’e fahe infraestrutura aloka $ 923,885.71 orsamentu ba operasionál $ 121,827.29.
Jornalista: Celestina Teles
Editór: Rafael Ximenes de A. Belo
