Timoroan rihun 18-resin hetan ona oportunidade bá serbisu iha Austrália

Sekretáriu Estadu ba Formasaun Profisionál no Empregu, Rogério de Araújo, reprezentante Governu Austrália no na’in ba empreza foto hamutuk ho traballadór timoroan sira hafoin serimónia asinatura deklarasaun molok bá serbisu iha Australia. Seremonia ne’e hala’o iha Hotel Palm Spring Dili, kinta 13 Marsu 2025. Foto Tatoli/António Daciparu

DILI, 13 Marsu 2025 (TATOLI) – Husi 2012 to’o 2025, timoroan hamutuk rihun 18-resin mak hetan ona oportunidade ba serbisu iha Austrália, informa Sekretáriu Estadu Formasaun Profisionál no Empregu, Rogério Mendonça de Araújo.

Nia adianta katak husi númeru traballadór rihun 18-resin ne’e, 4.500 mak daudaun kontinua serbisu iha país viziñu ne’e no restante fila ona mai Timor-Leste. Traballadór timoroan ne’ebé sai ona husi sistema hamutuk 977.

“Ba tinan ne’e sira ne’ebé hetan ona oportunidade ba serbisu iha Austrália besik ona 700 no ohin mós asina tan deklarasaun ho traballadór na’in-109 ne’ebé semana ne’e sei bá tan. Fiar katak ba trimestre dahuluk tinan ne’e sei aumenta tan númeru ne’e”, governante ne’e dehan iha Palm Spring, Fatuhada, ohin.

Traballadór timoroan 109 asina deklarasaun molok bá serbisu iha Austrália. Asinatura deklarasaun ne’e hala’o iha Hotel Palm Spring Dili, kinta 13 Marsu 2025. Foto Tatoli/António Daciparu

Daudaun ne’e, Governu Timor-Leste no Austrália mós halo hela planu atu iha futuru hasa’e kuota traballadór iha kada tinan hahú husi rihun 10 to’o 20.

Sekretáriu Estadu husu ba traballadór sira ne’ebé hetan ona oportunidade bá serbisu tenke disiplina no hatudu atitude di’ak, labele kontra regulamentu, nune’e empregadór sira nafatin fó konfiansa.

Ba traballadór timoroan sira ne’ebé sai husi sistema, Rogério de Araújo dehan Governu Autrália rona ona no sei fó bridging visa ka vistu temporáriu ba fulan tolu hodi evita traballadór sai husi sistema. “Hakarak ka lakohi fulan tolu ne’e ramata tenke fila, [kuandu] la fila sei deporta”, afirma.

Ba asuntu ne’e, SEFOPE halo ona diskusaun ho Ezekutivu Austrália atu fó vistu termporáriu ba fulan tolu de’it, labele to’o tinan ida. SEFOPE kontaktu ona ho Embaixada Timor-Leste iha Austrália no Departamentu Asuntu Esternu (DFAT, iha inglés) hodi haree kestaun ne’e.