DILI, 14 Marsu 2025 (TATOLI)—Ezekusaun Fundu Infraestutura (FI) atinje 15% ekivale ho millaun $7-resin husi montante orsamentu inisiál millaun $50,29, iha trimestre dahuluk 2025.
“Tanba projetu sira husi ongoing mai tenke selu,” Ministru Planeamentu Investimentu no Estratéjiku (MPIE) no Prezidente Konsellu Administrasaun Fundu Infraestrutura (KAFI), Gastão Francisco de Sousa, hateten liuhusi Programa Entrevista Eskluziva, iha estúdiu Agência Tatoli, Farol, sesta ne’e.
Nia informa, totál empréstimu hahú husi tinan 2011 to’o 2024, pur volta millaun $700-resin no ezekutadu foin millaun $200-resin.
“Agora sira seluk ne’e seidauk ezekuta osan sei iha ne’ebá hela, balun foin faze konkursu, balun tenke kansela no kansela la’ós projetu parradu maibé bele re-aloka fali ba projetu foun sira seluk pur ezemplu hanesan projetu ba bee nian Dili Oeste no Dili Leste, projetu ba bee Baukau, projetu bee Vikeke, projetu bee ba Lautein no to’o Manufahi, eletrisidade kansela, maibé finansia fali husi Orsamentu Jerál Estadu (OJE),” nia akresenta.
Notísia relevante : PN aprova Fundu Infraestrutura $312.203.618
Ministru katak, kansela ne’e iha razaun tanba halo empréstimu boot maibé la hatene sustentanbilidade ba oin ne’e halo oinsá.
“Ba bee bainhira ita halo empréstimu, ita lahatene bee aban bainrua sei iha ka lae no dalaruma ita selu empréstimu nafatin dalaruma bee ne’e laiha. Tanba ne’e tenke halo estudu ida di’ak ita haree fali ba oin,” nia tenik.
Jornalista : Nelson de Sousa
Editora : Julia Chatarina
