OEKUSI, 14 Marsu 2025 (TATOLI) – Komando Jerál Polísia Nasioná Timor-Leste (PNTL), nomea Inspetór Xefe Polísia Angelo Quelo, ba Komandante Interinu, Komandu Rejiaun Administrativa Espesiál Oekusi Ambeno (RAEOA).
Nomeasaun ne’e ho bazeia ba despaixu númeru 218/CG-PNTL/III/2025, kona-ba asuntu nomeasaun kargu Komandante Interinu PNTL Oekusi hodi troka Komandante Sesante, Superintendente Polísia, Nicolao Francelino da Costa.
Notísia relevante:PNTL Oekusi detein ona suspeitu taa nia-feen iha Cunha
Biban ne’e, Segundu Komandante Jerál PNTL, Komisáriu Pedro Belo, apela atu kumpre ieráriku bazeia lei organika PNTL nian ne’ebe hatuur dixplina no promove kooperasaun iha komandu.
“Saida mak atu halo ba oin, dixipliña no obedese ba ierárkia, respeita no dixipliña mak importante tebes ba ita nu’udar Polísia Nasionál. Agora dixipliña ne’e mak tenke hatene katak iha lei organika PNTL, hakerek klaru tebes ba ita, katak ita-nia natureza, formasaun, estrutura, dixpliña no estatutu pesoál tenke ho militár,” nia informa iha Oekusi, ohin.
Tanba ne’e, bainhira kumpre lei organika ne’e mak orientasaun saida de’it husi komandu, kuandu hatun mai kraik presiza la’o tuir mak ida-ne’e no laiha tan razaun seluk. Tan ne’e husu atu labele inklina an iha grupu partidu, labele prátika hili kor no rasa, katak ema foho no sidade oan maibé Polísia Nasionál Timor-Leste ida de’it.
“Ha’u husu ba komandante sira hotu iha Oekusi, atu promove unidade no kooperasaun, kuandu ita kria ona grupu iha instituisaun laran, maka iha loron ida ita sei la respeita malu no fiar malu, kuandu komandante foun sa’e troka komandante ida, ita ko’alia sei la rona malu ona tanba iha la’o sala ona, kuandu komandante la’o sala no kle’uk mak husi membru sira mós la’o tuir , tan ne’e ha’u husu maluk sira hotu, tau ida-ne’e ita-nia fuan no laran, katak PNTL ida de’it, saida mak ita bo’ot sira halo, kumpre ita-nia devér sira ho loloos” nia apela.
Nia hateten, oras ne’e daudaun Komandante Interinu nu’udar Oekusi-oan rasik, uluk ema bo’ot sira sempre ko’alia polítika katak Oekusi diviza ai-funan ne’e laiha, maibé kuda de’it ba munisipíu seluk, ida-ne’e klaru tanba laiha ofisiál ai-funan ida maibé iha mak ofisiál de’it.
“Ida-ne’e tanba razaun Oekusi la suporta malu, maibé sempre korta, kuandu ida sa’e bo’ot seluk buka dalan hodi hatuun lalais nia husi kargu, ida-ne’e mak akontese iha fatin barak,” nia afirma.
Iha fatin hanesan, Komandante Interinu PNTL Oekusi, Inspetór Xefe Polísia Angelo Quelo, promete sei mellora no promove unidade iha Komandu PNTL Oekusi.
“Iha tinan 2000 hahú hala’o kna’ar nu’dar membru PNTL iha Oekusi, iha loron 06 Marsu 2025, ha’u inisía ho ha’u-nia nomesaun kargu nu’udar Komandante Interinu PNTL Oekusi, ha’u sei halakon sistema foho no tasi, ha’u promete katak sei la eziste tán iha Oekusi no hakarak mellora prestasaun servisu liuliu ba asuntu seguransa iha Oekusi Ambeno,” nia katak.
Entretantu, totál membru efetivu iha Komandu PNTL Oekusi hamutuk 132 mak koloka ba eskuadra sub-rejiaun haat hanesan Oésilo, Pássabe, Nítibe no Pante Makasar inklui Ofisiál Polísia Suku (OPS) destakadu iha suku 18.
Notísia relevante:MI aloka millaun $14-resin konstrui infraestrutrura PNTL unidade 100 iha munisípiu
Jornalista: Abílio Elo Nini
Editór: Florencio Miranda Ximenes
