OEKUSI, 13 Marsu 2025 (TATOLI) – Segundu Komandante Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA), Inspestór Xefe Polísia Angelo Quelo, fó-sai katak halo ona detensaun durante oras 27 ba suspeitu hanesan la’en ne’ebé taa nia feen iha aldeia Noafafo, suku Cunha.
Tuir kronolojia kazu krime ne’e, Komandante PNTL kota katak akontese iha dadersan tuku 08:00, suspeitu ho inisiál FDC taa nia feen kaben inisiál FME, bainhira vítima (feen) atu ba servisu mosu dezentendimentu ho hanoin negativu tanba deskonfia malu husi nia la’en (suspeitu).
Notísia relevante:2024, PNTL Oé-Cusse rejista kazu 596 no na’in-11 tama prizaun
Ho diskusaun ne’e, suspeitu halo asaun foti ai ida baku uluk iha vítima nia ulun, depois ho kakorok, ikus mai taa tan ho katana iha parte ulun no kakorok inklui nia kabun.
“Akontesimentu ne’e ita-nia OPS informa kedas mai komandu eskuadra Pante Makasar, kontinua halo kedas atuasaun iha loron ne’e, agora vítima hala’o hela tratamentu baixa hela iha Ospitál Referál Oekusi ho kondisaun grave tebes no suspeitu kumpre hela sela detensaun oras 72,” nia informa ba jornalista sira, ohin.
PNTL enkamiña auto notisia ba iha Ministériu Públiku (MP) no suspeitu kumpre hela sela detensaun, hafoin aprezenta ba iha Ministériu Públiku (MP) hodi halo prosesu primeiru interrogatóriu.
Iha fatin seluk, Antania Elo, nu’udar mana bo’ot husi vítima nu’udar mós sasin, konta sai nia kronolojia iha Ospitál Referál Oekusi katak, primeiru vítima prepara hela matabixu, hafoin ida-ne’e vitima atu bá ona servisu fatin, maibé sei ku’u hela derok-masin fuan haat iha uma-oin, nune’e suspeitu (la’en) hasé dehan, derok ne’e atu lori ba ne’ebé?,
Vítima hatan dehan, lori bá servisu fatin, iha ne’ebá kolega balun lori modo no ai-manas, meudia sei la fila mai uma, maibé han de’it ho kolega iha servisu fatin. Tan ne’e suspeitu komesa si’ak ho lian maka’as dehan, loron-loron lori derok masin ne’e, to’o ne’ebé la haree servisu maibé fó han de’it mane sira.
“Tan ne’e vítima responde no komesa haksesuk malu ona, dehan nonok ona, sei hanesan ne’e ha’u deskansa ona, o mak ba buka servisu, ha’u ho labarik sira iha uma de’it ona, nune’e sira na’in-rua haksesuk malu manas liután,” nia informa.
Husi dezentendimentu ne’e to’o ikus suspeitu foti ai ida, baku uluk vítima nia ulun no baku mós iha kakorok, maibé vítima hada’u tiha ai ne’e, depois suspeitu foti tan katana taa iha ulun no vítima monu tama iha tahu laran no taa tuir tan iha kakorok no kabun.
Durante suspeitu halo asaun hasoru nia feen kaben laiha ema ida atu hakalma tanba suspeitu uza hela kro’at, só nia oan mane mak tenta atu hakalma, dehan to’o ona apa, ama mate ona, maibé suspeitu kontinua nia asaun.
“Ikus mai viziñu sira mak kontaktu ba polísia OPS hodi informa ba komando PNTL, molok sira to’o fatin akontesimentu, suspeita halai ses ona, depois PNTL to’o uma mak ba buka ka’er iha mota ninin, nia tenta atu subar maibé família hafuhu tutuir nia paradeiru,” nia informa.
Nia lembra katak durante ne’e vítima ho suspeitu sira-nia família ladun iha kooperasaun di’ak, baku malu no istória malu bebeik tanba deskonfia malu, maibé akontesimentu grave mak foin akontese daudaun ne’e.
Entretantu, vítima daudaun ne’e hala’o hela tratamentu iha Ospitál Referál Oekusi, sira-nia ona hamutuk na’in-haat komposta husi mane rua no feto rua.
Notísia relevante:PNTL rejista kazu violénsia doméstika aas iha Oé-Cusse
Jornalista: Abílio Elo Nini
Editór: Florencio Miranda Ximenes
