2024, PNTL Oé-Cusse rejista kazu 596 no na’in-11 tama prizaun
OÉ-CUSSE, 22 Janeiru 2025 (TATOLI)– Komandante Polísia Nasionál Timor-Leste (PNTL) Rejiaun Administrativa Espesiál Oé-Cusse Ambeno (RAEOA), Superintendente Polísia, Nicolao Francelino da Costa, relata iha Janeiru to’o Dezembru 2024, rejista kazu hamutuk 596, husi numeru ne’e na’in-11 mak konsege tama prizaun.
“Kazu 596 ne’e, mai husi kazu rua, krime 179 ita rejista husi sub-rejiaun haat, Pante Makasar 129 Oésilo 14, Pássabe 30 no Nítibe neen (6), no kazu violénsia doméstika mak aas hamutuk 417, entre kazu sira-ne’e hotu na’in-11 mak tama prizaun,” Komandante PNTL Oé-Cusse, Superintendente Polísia, Nicolau Francelino da Costa, iha Oé-Cusse, ohin.
Notísia relevante:PNTL Oé-Cusse sensibiliza knaar polisiamentu komunitáriu iha suku no aldeia
Tuir dadus iha fulan-Janeiru rejista kazu 32, Fevereiru mak kazu 20, Marsu kazu 34, Abril kazu 26, Maiu 25, Juñu 42, Jullu 32, Agostu 26, Setembru 41, Outubru 54, Novembru 38 no Dezembru kazu hamutuk 38.
“Kazu hirak-ne’e balun mai hato’o keixa direita iha kuartél PNTL, balun ami ba atende iha terrenu bainhira ami simu informasaun husi komunidade sira, balun rejista iha eskudra sub-rejiaun sira,”Komandante ne’e relata.
Tipu kazu sira-ne’e oioin, maibé barak liu mak problema ekonómia família, mak hamosu dezentendimentu ba malu hodi rezultadu baku malu, ne’ebé sempre akontese ba feen no la’en.
“Kazu balun ita prosesa to’o tribunál, tanba balun hakarak buka justisa no lia-loos, entaun parte PNTL rejista no prosesa karik parte rua la simu malu, bele enkamiña ba parte tribunál,” nia dehan.
Atu hamenus kazu referidu, Komandu PNTL Oé-Cusse sei kontinua hala’o sensibilizasaun kona-bá kna’ar polísiamentu suku, no mós oinsá halo prevensaun ba kazu krime sira-ne’ebé akontese iha komunidade nia le’et.
“Planu serbisu PNTL Oé-Cusse halo iha tinan 2025, ita kontinua nafatin halo sosializasaun, halo programa tama sai suku, liuliu iha liña fronteira, para halo sosializasauan kona ba prevensaun krime no kazu violénsia doméstika ne’ebé ninia númeru sa’e maka’as iha Oé-Cusse,” nia garante.
Notísia relevante:PNTL Oé-Cusse aprezenta kazu asalta malu ba Ministériu Públiku
Jornalista: Abilio Elo Nini
Editor: Florencio Miranda Ximenes
