iklan

HEADLINE, OEKUSI

PNTL Oé-Cusse aprezenta kazu asalta malu ba Ministériu Públiku

PNTL Oé-Cusse aprezenta kazu asalta malu ba Ministériu Públiku

Uma ida hetan danu iha kazu asaltu malu iha Oé-Cusse. Foto/Tatoli

OÉ-CUSSE, 06 Janeiru 2025 (TATOLI) – Komandu Polísia Nasionál Timor-Leste (PNTL) Rejiaun Administrativa Espesiál Oé-Cusse Ambeno (RAEOA) enkamiña ona autór sira ba Ministériu Públiku hodi submete ba prosesu iha tribunál tanba deskonfia estraga uma rua no hakanek joven ida hafoin asalta malu iha 24 Dezembru 2024, iha aldeia Mahata, suku Costa, sub-rejiaun Pante Makasar.  

“Insidente ne’e akontese iha 24 Dezembru, rezulta joven ida kanek grave no harahun uma rua, tanba joven sira barullu no asalta malu. Tan ne’e, Komandu PNTL Eskuadra Pante Makasar hamutuk ho F-FDTL tun direta halo atuasaun. Suspeitu sira ami identifika, agora enkamiña ona ba iha Ministériu Públiku. Ami labele fó sai númeru suspeitu na’in hira tanba kazu iha ona Ministériu Públiku”, Komandante PNTL Oé-Cusse, Superintendente Polísia, Nicolau Francelino da Costa, informa ohin.

Dirijente PNTL ne’e relata katak kazu ne’e akontese laiha relasaun ho grupu arte marsiál, maibé mai husi indivíduu no rezulta joven ida mak kanek grave no uma rua hetan estragu no ida ne’e la’ós danu agravadu maibé simples.

Notísia relevante: PNTL Covalima rejista kazu hitu durante selebrasaun Natál no tinan foun

Xefe aldeia Mahata, Febronia Colo.

Xefe aldeia Mahata, Febronia Colo, esplika kronolojia kazu akontese iha 24 Dezembru iha tuku 02h00 madrugada no kontinua to’o 25 lokraik.

“Uma rua ne’ebé hetan estragu ida-ne’e ha’u lahatene. Ha’u hatene fali husi viziñu sira telefone ba uma-na’in Francisco Lasi, tanba nia iha foho Kutete. Nia na’in mai to’o ne’e tuku 12:00 meiu dia. Mai to’o ne’e ami na’in-rua bá haree nia uma estragu ne’e. To’o uma ha’u hasai foto no informa kedas ba xefe suku atu hato’o ba parte seguransa hodi buka tuir sé mak estraga”, dehan.

Nia salienta bainhira identifika tiha uma rua ne’ebé hetan danu, liu de’it minutu balun grupu rua komesa ataka malu, tuda no tolok malu. Nune’e, nia telefone ba xefe suku no kontinua husu apoia ba Batallaun Orden Públika, F-FDTL no PNTL hodi bá kedas iha fatin, maibé la konsege kaptura autór sira tanba halai namkari.

Notísia relevante: PNTL rejista kazu sia no detein na’in-ne’en durante selebrasaun tinan foun

“Problema sempre akontese iha Mahata mak organizasaun arte marsiál sira. Ha’u ko’alia onestu de’it, husi ponte sorin IKS ka 80, husi ponte sorin PSHT ka 22. Baibain akontese problema hanesan ne’e, kalan ne’e mós sira mak asalta malu”, dehan.

Problema ne’e hahú husi provoka malu iha tuku 02:00 madrugada bainhira motorizada tolu mai husi dalan fronteira Sakato nian, ida tula ema na’in-tolu, maibé na’in-rua la uza kapasete, motorizada seluk tula ema na’in-rua, maibé ida la uza kapasete no motorizada ikusliu mai uza kapasete no tenta atu xoke ema no halai tuir motorizada rua ne’ebé hein hela iha kapela Mahata no sira hein malu iha ne’ebá hamutuk ema na’in-hitu.

Notísia relevante :PNTL Covalima rejista kazu hitu durante selebrasaun Natál no tinan foun

Situasaun ne’e komesa manas, tanba husi ponte sorin mós mai hamriik hotu hodi provoka malu, hakilar malu, nune’e komunidade hakbesik ba sira no husu atu labele provoka malu tanba kalan boot ona no sira ho kondisun lanu.

“Ha’u mak husu sira, balun dehan husi Santa Rosa no Sikluli, nune’e ha’u haruka sira atu fila, sira lakohi no kontinua hakilar. Entaun, ha’u kontaktu kedas ba xefe suku hodi hato’o ba parte PNTL mak foin to’o mai fatin akontesimentu, maibé to’o ne’e ema sira halai ona”, nia konta.

Mozinho Eco, nu’udar vítima, sente triste tanba nia uma foin mak konstrui, maibé hetan ona danu, nune’e nia husu ba parte kompetente atu halo prosesu investigasaun ba autór sira.

“Ha’u lahatene kronolojia akontese ne’e oinsá, tanba momentu akontese ne’e ami laiha uma. Ha’u rona de’it katak ema estraga ha’u-nia uma, tanba uma ne’e foin mak halo hotu, seidauk hela metin, ne’ebé ha’u triste tanba lahatene problema ne’e, maibé ha’u-nia uma mak hetan estragu”, nia hato’o.

Jornalista: Abílio Elo Nini

Editora: Maria Auxiliadora

iklan
iklan

Leave a Reply

iklan
error: Content is protected !!