iklan

HEADLINE, OEKUSI

PNTL Oé-Cusse sensibiliza knaar polisiamentu komunitáriu iha suku no aldeia

PNTL Oé-Cusse sensibiliza knaar polisiamentu komunitáriu iha suku no aldeia

PNTL Oé-Cusse sensibiliza knaar polísiamentu komunitáriu iha suku Nípani, sub-rejiaun Pante Makasar. Imajen/Mídia PNTL

OÉ-CUSSE, 07 Janeiru 2025 (TATOLI) – Komandu Polísia Nasionál Timor-Leste (PNTL) Rejiaun Administrativa Espesiál Oé-Cusse Ambeno (RAEOA) halo divulgasaun kona-ba knaar polisiamentu komunitáriu ba populasaun sira iha nivel suku no aldeia.

Komandante PNTL Oé-Cusse, Superintende Polísia Nicolau Francelino, dehan knaar polisiamentu komunitáriu mak sensibiliza Lei Kontra Violénsia Bazeia ba Jéneru, Lei Kontra Violénsia Doméstika, krime kontrabandu no habelar informasaun kona-ba oinsá atu prevene moras HIV/Sida husi komunidade sira, liuliu iha liña fronteira.

Nia dehan atividade divulgasaun ne’e ba programa rua, primeiru halo enkontru ho Konsellu Polisiamentu Komunitáriu (KPK) iha nivel suku sira no segundu introdús knaar polisiamentu komunitáriu ba komunidade iha liña fronteira sira.

Notísia relevante: PNTL Oé-Cusse aprezenta kazu asalta malu ba Ministériu Públiku

“Ami bá ekipa ida, seksaun investigasaun, seksaun tranzitu no UPF, tanba objetivu atu hametin liután relasaun ho komunidade sira iha liña fronteira, tanba komunidade barak iha fronteira ladún asesu ba informasaun no seidauk iha koñesimentu kona-ba prosesu kazu sivíl no kazu kriminál, inklui mós kazu violénsia doméstika ne’ebé durante ne’e nia númeru aas tebes iha Oé-Cusse”, afirma.

Nia informa atividade ne’e nia foku ba komunidade iha liña fronteira sira, liuliu iha postu Unidade Patrullamentu Fronteira (UPF) mak hanesan UPF Leolbatan, iha postu Nípani, postu Bobometo, ne’ebé realiza iha aldeia Nonquikan, nomós iha sub-rejiaun Pássabe realiza iha suku Abani.

“Komunidade entuziasmu hakarak rona, tanba sira falta informasaun. Programa ne’e ami foin hala’o dahuluk iha Oé-Cusse, tan ne’e iha futuru ita sei kontinua hala’o sosializasaun, nune’e sira bele entende knaar PNTL liga ho kazu sira, tanba funsionamentu husi KPK durante ne’e la’o kapa’as”, nia realsa.

Notísia relevante: Komisaun B observa PNTL Oé-Cusse menus komputadór no transporte

Jestór sub-rejiaun Pássabe, Paulino Marques, dehan sensibilizasaun ne’e bele halo komunidade iha nivel suku no aldeia entende serbisu PNTL nian, liuliu liga ba kazu sira.

“Ita hatene iha sub-rejiaun Pássabe susar tebes atu asesu ba estrada ho di’ak, maibé ami agradese tanba PNTL bele mai to’o ami-nia fatin. Ida-ne’e orgullu boot ba povu Pássabe atu hatene di’ak liután serbisu polísia nian, tanba dalaruma akontese violénsia oioin, maibé inan-aman sira ladún hatene kona-ba prosesu kazu sira-ne’e ba iha ne’ebé no la’o oinsá”, nia relasa.

Jornalista: Abílio Elo Nini

Editora: Maria Auxiliadora

iklan
iklan

Leave a Reply

iklan
error: Content is protected !!