DILI, 14 Marsu 2025 (TATOLI) – Ministru Obra Públika, Samuel Marçal, hateten konstrusaun ponte Abatu, iha postu administrativu Same Vila, munisípiu Manufahi, ramata ona no hein inugurasaun iha Maiu.
Governante ne’e dehan daudaun ne’e tempu udan, tanba ne’e sei hein no inaugura direta husi Primeiru-Ministru Xanana Gusmão.
Ponte Abatu ne’e hahú konstrui iha Outubru 2023 husi empreza Starking Unipessoal, Lda. Ponte referidu ho naruk metru 18 no luan metru 8 ho totál orsamentu $856.113,56.
Iha sorin seluk, Prezidente Autoridade Munisípiu Manufahi, Luís Tavares, agradese ba Governu sentrál, liuliu Ministériu Obra Públika ne’ebé hatán ona nesesidade povu nian hodi konstrui ponte Abatu, maski seidauk inaugura.
“Ponte ne’ebé konstrui ne’e ho kualidade no ita orgullu tanba halo husi kompañia timoroan Starking no enjiñeiru sira mós timoroan. Ida-ne’e signifika neineik maibé ita mós komesa promove timoroan hodi serbisu rasik iha nia rain”, Luís Tavares dehan ba Tatoli via telefone.
Relembra katak ponte Abatu kotu tanba kauza husi udan-boot ne’ebé akontese hodi hamosu inundasaun iha loron domingu, 02 Jullu 2023.
Notísia relevante: Autoridade Manufahi presiza mákina pezadu hodi normaliza infraestutura a’at kauza dezastre naturál
Jornalista: Arminda Fonseca
Editora: Maria Auxiliadora
