MANUFAHI, 15 Marsu 2025 (TATOLI)—Primeiru-Ministru, Xanana Gusmão, enkoraja joven Turiskai, Munisípiu Manufahi, atu promove unidade hodi hadomi malu iha sosiedade no hadook aan husi grupu arte marsiál ne’ebé halo violénsia.
“Husu ba joven sira hakuak malu nafatin ba. Hau lakohi rona arte marsiál nia naran iha Turiskai ne’e,” Xanana hateten iha nia intervensaun iha ámbitu serimónia atribuisaun sertifikadu lisensa konsensaun ba empreza Tivan husi Austrália hodi hahú halo prospesaun no peskiza ba mineiru metáliku, iha Turiskai, sábadu ne’e.
Xefe Governu solisita Turiskai oan sira tenke hadomi malu no hakuak malu tuir katuas sira, katak maski hahán laiha, mama de’it malus mós hadomi malu.
“Ita atu dezenvolve ita-nia área oinoin hanesan edukasaun, saúde. Tanba ne’e, husu ba imi ne’ebé eskola universidade, imi labele hanoin atu halo buat barak no buat boot, maibé hanoin saida mak rai ne’e presiza. Imi bá eskola filafali mai oinsá mak ita dezenvolve ita-nia rai,” nia afirma.
Notísia relevante: Governu atribui sertifikadu lisensa ba empreza Tivan halo peskiza mineiru metáliku
Xanana mós husu joven Turiskai oan atu kontinua promove kultura orijinál Turiskai nian tanba kultura mak nu’udár huun no abut timoroan nian.
“Keta moe. Kaer nafatin ita-nia kultura. Ida-ne’e mak ita-nia huun no abut. Keta haluha O-nia raan no O-nia abut,” nia subliña.
Jornalista: Natalino Costa
Editór: Xisto Freitas da Piedade
