DILI, 17 Marsu 2025 (TATOLI)—Reprezentante povu sira iha Parlamentu Nasionál (PN) liuhusi reuniaun plenária, segunda ne’e, levanta kestaun estrada no ponte iha territóriu, nune’e husu ba Governu atu normaliza urjente.
“Iha vizita eleitorál iha semana kotuk, simu preokupasaun komunidade iha postu Fohoren no postu seluk iha munisípu Kovalima kona-ba estrada a’at, liuliu iha tempu udan difikulta movimentu transporte públiku atu asesu lori produtu lokál ba merkadu,” Deputada Bankada Governu husi Partidu Demokrátiku (PD), Sancha Tilman, hato’o.
Iha fatin hanesan, Deputadu Bankada Governu husi Kongresu Nasionál Rekonstrusaun Timorense (CNRT), Natalino dos Santos, foti kestaun kona-ba mota iha ponte Tafara iha Kovalima, ne’ebé loron hirak liubá udan boot afeta ba komunidade lokál nia movimentu.
“Se Governu la halo intervensaun lalais mak nia konsekuénsia populasaun iha ne’ebá inklui kapela ida iha Tabolo sei ameasa,” nia fó sai.
Notísia relevante : Deputadu komisaun E husu Governu tau atensaun ba ponte Loes
Nia dehan, mota Beluli no mota Maumali iha Ainaru l iha tempu udan afeta tebes ba komunidade nia natar iha aredór Kasa, Lia, Faulata ho Betano, nune’e Governu presiza normaliza no harii morru protesaun.
Aleinde ne’e, Deputadu ne’e husu atu entidade responsável husi Governu bele haree mós estrada ba Fatumea.
Deputadu CNRT, Saul Salvador, hateten, daudaun tempu udan, tanba ne’e presiza tau atensaun ba estrada iha Fatumea tanba iha fatin tolu mak kotu.
Nune’e mós, Deputada CNRT, Carminda Carlota, foti preokupasaun povu iha suku Manibu, postu Bobonaru, munisípiu Bobonaru ne’ebé hato’o katak, estrada liga entre suku Manibu ho Kolimau, postu Atsabe no postu Bobonaru kotu.
“La’ós ida-ne’e de’it, tempu udan hanesan ne’e postu Bobonaru no postu Lolotoe povu sira iha ne’ebá hetan difikuldade tebes tanba estrada kotu iha fatin-fatin no mota tun hanesan foin daudaun iha Louro konsege lori karreta ida,” nia katak.
Vise-Ministru asuntu Parlamentár, Adérito Hugo, rejista preokupasaun sira ne’e no sei hato’o ba ministériu tutela hodi tau atensaun.
Jornalista : Nelson de Sousa
Editora : Julia Chatarina
