DILI, 17 Marsu 2025 (TATOLI)—Uma-kain 63 iha aldeia Uatulesu, suku Waimori, munisípiu Vikeke seidauk asesu ba eletrisidade.
“Hakarak foti preokupasaun povu nian iha kraik iha munisípiu Vikeke Vila, iha suku Waimori, aldeia Uatulesu, iha uma-kain 63 desde uluk to’o agora la asesu ba eletrisidade,’’ Deputadu Bankada Governu husi Kongresu Nasionál Rekonstrusaun Timorense (CNRT), Anacleto Freitas, levanta kestaun ne’e liuhusi reuniaun plenária iha Parlamentu Nasionál, segunda ne’e.
Iha fatin hanesan, Deputudu CNRT, Marcos Soares Martins, levanta preokupasaun komunidade husi aldeia Poehei iha Ermera, kona-ba instalasaun eletrisidade konklui tiha ona iha tinan 2017 maibé to’o agora ahi seidauk lakan, nune’e husu parte kompetente atu tau atensaun.
Notísia relevante : Komisaun E rekomenda EDTL, E.P aselera implementasaun projetu eletrifikasaun
Nune’e mós, Deputadu Bankada opozisaun husi Frente Revolsionáriu Indepedente Timor-Leste (FRETILIN), Antonino Doutel Sarmento, foti kestaun asesu eletrisidade iha área izoladu iha Manufahi.
“Semana kotuk hala’o kontaktu eleitorál iha aldeia haat Nelume, Laro, Leonae no Oerema, komunidade hato’o preokupasaun seidauk asesu eletrisidade,” nia hato’o.
Reprezentante Governu liuhusi Vise-Ministru asuntu Parlamentár, Adérito Hugo, rejista preokupasaun sira ne’e no sei hato’o ba ministériu tutela hodi tau atensaun.
“Investimentu boot iha rai-laran maka enerjia eletrisidade iha territóriu nasionál tomak, ne’ebé ho ninia kapasidade 257 megawatt, agora ita-nia populasaun asesu ona mais 80% hela de’it ona 10%, daudaun Governu hala’o hela atu kompleta ba 100%,’’ nia akresenta.
Tuir dadus to’o fevereiru 2024, iha aldeia 310 husi suku neen iha territóriu nasionál mak seidauk asesu enerjia eletrisidade.
Jornalista : Nelson de Sousa
Editora : Julia Chatarina
