DILI, 18 Fevereiru 2025 (TATOLI)—Prezidente Komisaun E iha Parlamentu Nasionál (PN) ne’ebé trata asuntu Infraestrutura, Marcos Xavier, rekomenda ba Eletricidade de Timor-Leste, Empreza Públika (EDTL, E.P) atu aselera projetu eletrifikasaun ba suku no aldeia sira iha territóriu ne’ebé seidauk asesu eletrisidade.
“Rekomenda aselera prosesu konkursu ba eletrisidade, liuliu aldeia ne’ebé mak seidauk tama, aselera para tinan2026 ahi tenke tama hotu ona,” Reprezentante povu hato’o iha resintu PN, tersa ne’e.
Deputadu Bankada opozisaun husi Kmanek Haburas Unidade Nasionál Timoroan (KHUNTO), Luís Roberto, husu atu tau atensaun ba komunidade iha aldeia neen iha postu administrativu Lautein ne’ebé to’o agora seidauk asesu eletrisidade.
“Ukun-an ida-ne’e, suku no aldeia balun seidauk sente ho kompletamente. Aldeia neen husi suku Maina 2, Maina 1, postu Lautein, munisípiu Lautein (Zona Alto Laleno) nian ne’ebé uluk sai mós baze gerilleiru sira, maibé populasaun aldeia neen iha fatin referidu seidauk kalan sei sunu kamii no ahi tradisionál,” nia preokupa.
Notísia relevante : Prezidente Komisaun D nota lei rai no eletrisidade sai preokupasaun ba investidór
Deputadu Bankada Governu husi Partidu Demokrátiku (PD), Armando Lopes, levanta iha munisípiu Lautein, iha aldeia Kekeharan to’o agora seidauk asesu eletrisidade.
Deputada Bankada opozisaun husi Frente Revolucionária de Timor Leste-Independente (FRETILIN), Dario Madeira, hato’o, aldeia barak iha postu Uatulari, munisípiu Vikeke mak seidauk asesu eletrisidade, nune’e husu atu tau atensaun.
Antes ne’e, iha reuniaun plenária PN, reprezentante povu sira levanta mós kestaun komunidade iha aldeia balun iha territóriu seidauk asesu eletrisidade ne’ebé, presiza hetan atensaun.
Tuir dadus to’o fevereiru 2024, iha aldeia 310 ho suku neen mak seidauk asesu enerjia eletrisidade.
Jornalista : Nelson de Sousa
Editora : Julia Chatarina
