DILI, 18 Marsu 2025 (TATOLI) – Aviaun foun husi kompañia aérea Aero Dili ho modelu Airbus A319-100 sei semo dahuluk mai Timor-Leste iha 21 Marsu. Tuir planu, aviaun ne’e to’o iha Aeroportu Internasionál Nicolau Lobato pur volta tuku 17h00.
Diretór-Ezekutivu Aero Dili, Lourenço de Oliveira, informa Airbus A319-100 ho nia matríkula Four Whiskey-Alfa Alfa Oscar (4W-AA0) pinta ho bandeira Timor-Leste nian husi PT. Industri Pesawat Terbang Nurtanio (IPTN) iha Bandung-Indonézia.
“Aviaun sei to’o mai 21 Marsu ho konfigurasaun business class kadeira ualu no klase ekonomia 128”, Lourenço hateten iha Timor Plaza, ohin.
Nia adianta katak bainhira aviaun foun ne’e to’o, sei halo operasaun hodi espande nia rota internasionál bá Xina, Singapura, Austrália no Tailándia.
Kona-ba sasemok bá Austrália nian daudaun iha hela prosesu aprovasaun nia-laran, tanba la’ós de’it hetan aprovasaun husi Autoridade Aviasaun Sivíl Timor-Leste (AACTL), maibé mós husi Autoridade Seguransa Aviasaun Sivíl Austrália nian.
“Posibilidade tinan ne’e ita semo tan bá Austrália no Tailándia”, nia informa.
Tuir site ofisiál husi Planespotters.net, Airbus A319 ne’ebé rejista hanesan 4W-AAO, nu’udar aviaun produsaun ida husi empreza Hamburgu (XFW) husi Alemaña, ne’ebé antes ne’e na’in husi China Easthern Airlines ho númeru rejistu B-6231 dezde Jullu 2006 no ikus mai transfere ba Aeroportu Internasionál Husein Sastranegara, Bandung, Indonézia iha loron 18 Janeiru tinan ne’e atu pinta.
Lembra katak Aero Dili iha ona nia aviaun dahuluk ho modelu Airbus A320, ne’ebé uluk opera husi Bangkok Airways no hetan ona konfigurasaun atu tula pasajeiru hamutuk 162.
Aviaun ida-ne’e to’o iha Dili iha loron 20 fulan-Marsu tinan 2023. Ninia prezensa halo istória nu’udar aviaun komersiál dahuluk ho bandeira Timor-Leste nian.
Iha loron 12 fulan-Maiu 2023, Aero Dili nia Airbus A320 hahú halo nia vou internasionál sira ne’ebé ajenda ona dahuluk, entre Dili – Denpasar/Bali, Indonézia. Iha Fevereiru 2024, aviaun ida-ne’e lansa mós nia rota internasionál entre Dili-Singapura.
Foin lalais, iha loron 14 Fevereiru 2025, kompañia área ne’e inaugura tan nia vou ligasaun entre Dili no sidade xineza Xiamen.
Notísia relevante: Airbus A319 husi Aero Dili sei to’o Timor-Leste iha Marsu
Jornalista: Arminda Fonseca
Editora: Maria Auxiliadora
