DILI, 18 Marsu 2025 (TATOLI)–Deputada Bankada Opozisaun husi Kmanek Haburas Unidade Timoroan (KHUNTO), Irene Gongaza, husu ba Ministériu Transporte no Komunikasaun liuhusi Diresaun Nasionál Transporte (DNTT) atu tau atensaun ba sinál tránzitu, hanesan zebra cross iha Dili.
“Zebra cross ita haree iha Dili laran kuaze lakon hotu, tinta sira kuaze laiha hotu, ezemplu iha Parlamentu nia oin laiha ona, difikulta tebes bainhira estudante atu ultrapasa bá estrada sorin, ida-ne’e fó risku,” nia hato’o iha Parlamentu Nasionál (PN), kuarta ne’e.
Notísia relevante : MTK presiza halo manutensaun sinál tránzitu iha kapitál Dili
Nune’e, nia husu ministériu kompetente hanesan Ministériu Transporte no Komunikasaun (MTK) atu tau atensaun.
Iha fatin hanesan, Deputadu Bankada Governu husi Kongresu Nasionál Rekonstrusaun Timoroan (CNRT), Gabriel Soares, husu Governu atu tau atensaun ba zebra cross iha kapitál Dili tanba nia nota liuliu iha parte Palásiu Governu no besik iha Embaxada Portugal liña zebra cross ne’ebé iha ninia marka koor komesa lakon ona.
“Ida-ne’e risku tebes, tanba kuaze atu mosu beibeik asidente iha ne’e,” nia preokupa.
Nune’e mós, Deputada CNRT, Carminda Carlota, konsidera asuntu ne’e presiza tau atensaun sériu.
“Iha loron 13 Marsu iha alin feto ida nia korta estrada iha zebra cross iha Delta, karreta sira liu para maibé motór husi kotuk halai lansadu soke mate iha fatin, la’ós ne’e de’it maibé iha ne’ebá akontese barak ona,” nia katak.
Vise-Ministru asuntu Parlamentár, Adérito Hugo da Costa, rejista preokupasaun ne’e no sei enkamiña ba entidade relevante hodi tau atensaun.
Jornalista : Nelson De Sousa
Editora : Julia Chatarina
