DILI, 13 agostu 2024 (TATOLI)—Prezidente komisaun E trata asuntu Infraestrutura iha Parlamentu Nasionál (PN), Marcos Xavier, husu Ministériu Transporte no Komunikasaun (MTK) liuhusi Diresaun Nasionál Transporte Terrestre (DNTT) atu halo manutensaun ba sinál tránzitu iha kapitál Dili.
“Ha’u observa iha Dili laran, tinta ne’ebé pinta zebra cross lakon hotu ona, lahatene orsamentu iha 2024 ne’e prevee ka lae. Preokupa ho sinál tránzitu sira-ne’e, tanba iha tempu badak Santu Padre sei mai Timor-Leste,” nia hato’o liuhusi intervensaun iha reuniaun plenária komisaun permanente iha PN, tersa ne’e.
Aleinde ne’e, nia preokupa tanba tuir nia observasaun katak sumafro balun avaria hanesan iha Aitarak-Laran no fatin sleuk tan.
Ho nune’e, nia husu ba Ministériu Transporte no Komunikasaun (MTK) liuhusi Diresaun Nasionál Transporte Terrestre (DNTT) atu halo manutensaun ba sinál tránzitu sira-ne’e antes Papa Francisco hala’o vizita Estadu no pastorál iha Timor-Leste, iha 09-11 setembru 2024.
Vise Ministru asuntu Parlamentár, Adérito Hugo da Costa, rejista preokupasaun refere no sei hato’o ba ministériu relevante atu tau atensaun.
Jornalista : Nelson de Sousa
Editór : Cancio Ximenes
