DILI, 18 Marsu 2025 (TATOLI)–Prezidente Komisaun E iha Parlamentu Nasionál (PN) ne’ebé trata asuntu Infraestutura, Marcos Xavier, nota ezekusaun Fundu Infaestrutura (FI) ba trimestre dahuluk tinan fiskál 2025 ki’ik tanba prosesu aprovizionamentu la’o kleur.
“Tuir loloos ezekusaun trismestre dahuluk tenke sa’e, maibé ki’ik tanba impaktu ne’e mai husi liña ministeriál. Komisaun deteta liuliu ba prosesu aprovizionamentu ba konkursu normál la’o kleur, ezemplu loke dokumentu fulan-tolu, hafoin haree dezeñu entaun lori fulan-neen halo prosesu ne’e naruk liu,” Prezidente Komisaun E hato’o iha resintu PN, tersa ne’e.
Tanba ne’e, Komisaun E rekomenda ona ba Governu liuhusi Ministériu Planeamentu no Investimentu Estratéjiku (MPIE) atu haree hosi halais prosesu konkursu “se la’e tinan ida ita labele halo buat ida.”
Aleinde ne’e, nota mós katak ezekusaun FI ki’ik tanba projetu sira la’ós obra públika nian de’it, maibé akumula ministériu hotu ninia orsamentu.
Nune’e, depedente ba ministéiru sira oinsá halo prosesu dokumentu haruka ba Konsellu Administrasaun Fundu Infraestrutura (KAFI) hodi bele obra ne’e bele la’o.
“Agora filafali ba sira, hanesan uluk tinan-tinan ezekusaun orsamentu ba Fundu Infraestrutura ne’e ki’ik tanba liña ministeriál tau tiha osan ba atu eskola, ospitál, edifísiu, ida-ne’e no fim dezeñu no BOQ laiha,” nia akresenta.
Notísia relevante : Ezekusaun Fundu Infraestrutura ba empréstimu atinji 15% iha trismestre dahuluk
Komisaun D tuir planu iha tempu badak sei halo fiskalizasaun ba Komisaun Nasionál Aprovizionamentu (CNA, sigla portugés) hodi haree prosesu legál no administrasaun ba projetu.
Ministru Planeamentu no Investimentu Estratéjiku no Prezidente KAFI, Gastão de Sousa, foin lalais relata, progresu ezekusaun FI iha trimestre dahuluk tinan 2025 ho montante millaun $310,75 komposta husi millaun $260,46 ne’e foin atinje 1,5% no empréstimu millaun $50,29 atinje 15%.
Iha fulan-Jullu sei implementa kódiku foun ba aprovizionamentu no kontratu públiku, nune’e bele ezekuta ho lais no kualidade.
Jornalista : Nelson de Sousa
Editora : Julia Chatarina
